Алатай асирдин 89-йисан майдин вацра хайиди тир «Лезги газетдин» редакциядин коллективди заз санаторийда ял ягъун тешкилнай. Гьакъикъатда лагьайтIа, заз стхавилин сурара кучукнавай хайи бубадин сурал фин кьисмет хьанай.
Гьа икI, зун майдин вацран сифте йикъара бубади душмандикай хвейи Украинадин Одесса шегьерда авай Куяльник тIвар алай санаторийдиз акъатна. Гьеле виликамаз за хуьре кучукнавай чIехи бубадин ва бадедин сурарилай накьвар кIватIна, абур пакетда туна, жувахъ галаз кьунвай.
Зун жуван уьмуьрда сифте яз Украинадин чилел, Одессадин областдин Березовский райондин Викторовка хуьре, чкадин агьалийри тежедай хьтин хуш гьалара кьабулна. Березовка разъезддал гъалатI яз электричкадай эвичIай зун райцентрадивай 18 километрдин яргъа амукьна. Къацу махпурдиз ухшар авай, цуькламиш хьанвай, зи кайваниди хранвай халича хьтин майдандиз за пудра икрам ийизвайла, зи къаншарда атана мотоциклдал алай итим акъвазна.
— Эй мужчина, кто вы?! Что вы делаете? За ам зун вуж ятIа ва гьиниз физватIа гъавурда туна. И регьимлу касди няни жезвай вахтунда зун райцентрадиз агакьарна. За вичивай ваз гьикьван пул кIанзава лагьана хабар кьурла, ада «Куь Дагъустанда ихьтин дуьшуьшра пул теклифдайди яни?! Зун эсиллагь райцентрадизни къвезвайди тушир…», — лагьана жаваб хгана.
Гьа икI, 8-майдиз зун Березовский райцентрада авай. Сифте нубатда зун военкоматдиз фена, анай бубадин гьакъиндай дуьз делилар жагъурна. ЧIехи Гъалибвилин сувар къейдзавай юкъуз — 9-Майдиз — зун бубадин сурал фена. Инал кIватI хьанвай инсанрин вафалувал, гьуьрметлувал икьван чIавалди заз уьмуьрда санани акурди тушир…
Зун санаторияда хьайи са шумуд юкъуз Одесса шегьердин саки вири чкайра хьана. Зал гьич санани украин чIалал рахазвай кьве кас кьванни дуьшуьш хьаначир…
Жуван куьруь макъала заз бубадин экуь къаматдиз бахшнавай шиирдалди акьалтIариз кIанзава:
* * *
Тамарзу яз къамат такур буба зи,
Къе вун сагъ яз ахварай зав рахазва.
Ширин мецел хабар кьазва: «Бала зи,
Вучиз икьван вун перишан аквазва?!».
Яргъал мензил, яргъал рекьер атIана,
Атанва зун стхавилин сурал ви.
Гъамлу рикIи гьасятда кьатIана,
ЦIийи-цIийи хирер хьанва хурал ви.
Вуна хвейи Одессадин чилел чи,
Къе фашистри инсанриз цIай ягъизва.
Машгьур ксар, даим хьайи мецел чи,
Русвагь ийиз Гитлер рикIел хкизва.
Одессадин кьуд пипIе зун къекъвезва,
Аквазвайди гьуьрмет кIани миллет я.
Ви келимани хквезва рикIел зи,
Вири фена, амукьдайди гьуьрмет я.
Гъалибвилин 80 йисан сувар я,
Мад суварар, цIийи вахтар къвез фида.
И кардикай ви руьгьдизни хабар я,
Невейри вун чпин рикIел хкида.
Казим Казимов
