ЧIехи Гъалибвал къачуник дяведин далу пата зегьмет чIугур агъзурралди инсанрини еке пай кутуна. Ахьтинбурукай сад ЦIийи хуьре яшамиш жезвай ва вичин уьмуьрдин 99 лагьай гатфар къейднавай Ярагьмедова Авизар Жарулаевна я. Чина берекатдин нур авай, сивел хъвер алай мегьрибан дишегьлиди чун кIвале хушвилелди кьабулна. Яшлу дидедин биришар авай чинай чаз адан уьмуьрдин еришар, рикIин керчеквал аквазва.

Малум хьайивал, А. Ярагьмедова 1926-йисуз Ивигрин хуьре дидедиз хьана.

Кьуд лагьай классдал кьван кIелна, мад адаз кIелун давамардай мумкинвал хьанач.

Дяве башламиш хьайи вахт, дяведин четин йисар яшлу дишегьлидин рикIел хъсандиз алама. Ада лагьайвал, буба ва кьве имини фронтдиз фенай.

Дяведин йисара Ивигрин хуьре        М. Горькийдин тIварунихъ галай колхоз авай. Зегьметчияр магьсулдарвилел ва малдарвилел машгъул жезвай, гьакIни картуфар ва маса няметар гьасилзавай.

— Колхозчи амай дишегьлийрихъ галаз зани гвенар гвена, векьер яна, мал-къарадихъ гелкъвена, — лугьузва Авизар­ Ярагьмедовади. — Тандал бегьем партал алачиз, руфуна тух жедайвал фу авачиз, колхозчийри фронтдиз техил, як, гъери гун патал тIимил зегьметар чIугунач. Идалайни гъейри, нянрихъай кIвалахдилай кIвализ хтайла, фронтда авай чи аскерар патал йифиз чна гуьлуьтар, бегьлеяр храдай.

Малум хьайивал, Авизар Жарулаевнади хъуьтIуьн мекьериз таб гана, оборонадин сенгерар эцигунин, къаналар ягъунин кIвалахрани иштиракна.

Дяведин йисара далу пата гьакъисагъвилелди зегьмет чIугунай А. Ярагьмедовадиз ДАССР-дин Верховный Советдин ва Армиядин командованидин патай грамотаяр гана.

Дяведин залан йисар алатна. 1950-йисуз кIвенкIвечи колхозчи Авизарани Агъа Арагърин хуьряй тир Ватандин ЧIехи дяведин иштиракчи Ярагьмеда чпин хизан кутуна.

Авизар Жарулаевнади чаз вичин уьмуьрдин юлдашдин женгинин рекьерикайни куьруь ихтилат авуна.

Документри шагьидвал ийизвай­вал,­ Я. Ярагьмедова 20-мотострелковый пол­­­кунин, 105-пограничный отряддин 55-полкуник кваз женгера иштиракна­. Ам стрелковый отделенидин командир­, лишан­чи тир. Сержант Ярагьмедова Моск­вадин патарив ва Ленинграддин те­реф­да кьиле фейи къати женгера иштиракайди ва женгинин рекьерай ам Берлиндиз кьван фейиди документрай тес­тикь жезва. Ярагьмед Агъамалиевичахъ «Германиядин винел гъалиб хьунай» ва маса медалар авай.

Авизар Жарулаевна ва Ярагьмед Агъамалиевич арада гьуьрмет-хатур, кIа­нивал аваз тамам 36 йисуз санал яшамиш хьана. Жуьреба-жуьре идарайра яргъал йисара намуслудаказ кIвалах авур, абурукай тамам 26 йисуз райфинотделда  инспекторвал авур Ярагьмед Ярагьмедов 1986-йисуз рагьметдиз ­фена.

Кьиблепатан Дагъустанда чилер зурзуникди 1966-йисуз Ивигрин ва Агъа Арагърин хуьрерин агьалияр, гьабурукай­ яз Ярагьмедоврин хизанни, Кьасумхуь­рел (ЦIийи хуьруьз) куьч хьана, ина кIвал-югъ кутуна.

А. Ярагьмедовади сифтедай колхозда, гуьгъуьнлай Кьасумхуьрел жуьреба-жуьре чкайра 50 йисалай виниз зегьмет чIугуна, вичи лугьузвайвал, чIехи хизандин къул хвена, веледриз са куьникайни дарвал ганач, къуни-къуншийрихъ галаз гьуьрметлудаказ уьмуьр тухвана.

Авизар дидеди 8 аял хана, сад рагьметдиз фена, амай веледар уьмуьрдин шегьредал акъудна. Веледрихъ чпин кIвал-югъ, хизанар хьанва.

— Зун зи гадайрилай, сусарилай, рушарилай, хтулрилайни птулрилай гзаф рази я, — давамарзава ихтилат А. Ярагьмедовади. — Зи кефи садани, садрани хайиди туш. Патарал алай веледрини хтулри заз гьар юкъуз телефондай зенгер ийида, зи гуьгьуьл къачуда. Им зун патал бахтлувал я.

Гьа са вахтунда, Донбассда кьиле физвай дяведин махсус серенжем фад куьтягь хьун, анин вири иштиракчияр гъалибвал гваз кIвалериз хтун А. Ярагьмедовадин мурад я.

КIвалин берекат тир Ярагьмедова Авизар Жарулаевнадиз 100 йисан ­юбилей къейд ийидай югъни акун чи мурад я.

Хазран  Кьасумов