И йикъара зи телефондиз таниш тушир нумрадай зенг авуна.

— Зун Сургут шегьерда кIвалахзавай кьеанви Халил Абдуллаев я, — лагьана  касди­, — ЧIехи Гъалибвилин 80 йисан вилик заз вуна­ зал вичин тIвар эхцигнавай зи чIехи буба, Ватандин ЧIехи дяведин иштиракчи Халил Абдуллаевакай макъала кхьенайтIа кIанзавай. Хуьруьнвийри рикIел хкизвайвал­, зи чIехи буба лап къени къилихдин инсан, гьа­къисагъ зегьметчи — колхозчи, дяведа ви­кIегь женгчи тир.

Зун Эминхуьре яшамиш жезвай Исмаил Халилович Абдуллаеван кIвализ фена, адан бубадин уьмуьрдин, зегьметдин ва женгинин рекьер къалурзавай документрихъ галаз таниш хьана.

1977-йисуз Эминхуьруьз куьч хьайи Кье­­анрин хуьре 40 кIвал-майишат авай. Ана 1930-йисуз сифтегьан школа ачухна­, 1932-йисуз «ЦIийи дуьнья» колхоз теш­килна.­

Ватандин ЧIехи дяведин йисара и гъве­чIи хуьряй саки 30 кас фронтдиз фена. Абурукай 13 кас гъалибвал гваз ватандиз хтана. Абурун арада­ ­Ва­тандин  дяведин,  Яру  Гъетрен­  ор­ден­рин  ва  медалрин  сагьибар  тир  Мавлуд  Бабаев, Гьажимуслим Жи­ге­ров, Рамазан Агъаханов, Халил Абдуллаев­ авай.

Халил Абдуллаев 1908-йисуз Кьеанрин хуьре дидедиз хьана. Кьуд лагьай классдал кьван кIелдай мумкинвал хьайи гадади вичин зегьметдин рехъ фад башламишна. Ада хуьруьн «ЦIийи дуьнья» колхозда зегьмет чIугуна. Гьа йисара колхозда малдарвал, магьсулдарвал, хипехъанвал вилик физвай. Дирибаш гадади колхозда маларни хвена, векьерни яна, гадни агудна.

Ватандин ЧIехи дяве башламиш хьана. Кьасумхуьруьн РВК-ди эвер гуналди, Халил­ Абдуллаев 1941-йисан сифте кьилера­ фронтдиз фена. Кавказ, Украина, Белоруссия, Венгрия… Пияда кьушунрин аскер, лишанчи яз, Халил Абдуллаева немсерин жаллатIриз ­ягъунар кьуна. Дирибаш дагъвидал пуд сеферда хирер хьана. Госпиталра сагъар хъувурдалай гуьгъуьниз ам гьар сеферда къизгъин женгерик экечI хъувуна. Халил Абдуллаеван женгинин рехъ фашистрин магъарада — Берлинда акьалтIна.

Рейхстагдин цлал «Чун гьахъ тир ва гъалибни хьана» гафар кхьей Халил Абдул­лаев 1945-йисан июлдин вацра ватандиз хтана.

Ватандин дяведин 2-дережадин ордендин, «Кавказ хуьнай», «Минск азад хъувунай», «Киев азад хъувунай», «Дирибашвиляй», «Германиядин винел гъалиб хьунай» медалрин сагьиб Х. Абдуллаева «ЦIийи дуьнья» колхозда лежбервиле, маларин фермадин заведующийвиле намуслудаказ зегьмет чIугуна.

Дяведин ва зегьметдин ветеран, ферли 6 веледдин буба Халил Абдулла­ев 1968-йисан 21-мартдиз рагьметдиз фена.

Духтур, философ Авиценнади лагьайвал, инсан алемдиз аквазвай кьван гагьди ваъ, инсанрин рикIел аламай кьван гагьди яшамиш жеда. Хтулдин ри­кIе амай чIехи буба Халил Абдуллаев хьиз.

Хазран Кьасумов