Эр-Риядда рахунар ­кьиле тухвана

25-мартдиз «РИА Новости» чешмеди хабар гайивал, Эр-Риядда Россиядинни США-дин векилрин арада кьиле фейи рахунар итижлубур, четинбур ва бегьерлубур хьана.

Сенатор Григорий Карасина къейд авурвал, кьве терефдин фикирар гьамиша садбур жезвач, амма Мос­квадини Вашингтонди сада-садахъ галаз алакъа­лувилелди веревирдер авунин тегьер жагъурда. Гьахь­тин мумкинвал хьанва.

Россиядинни США-дин вилик-кьилик квай векилрин арада 24-мартдиз кьиле фейи рахунар 12 сятда давам хьана. Москвадин патай рахунра Г. Карасина ва ФСБ-дин директордин меслятчи С. Беседади иштиракна.

Россиядин Президентдин пресс-секретарь Д. Пес­ко­­ва 25-мартдиз хабар гайивал, кьве уьлкведин дес­тей­рин арада кьиле фейи рахунрин нетижаяр СМИ-рин чешмейра раиждач. «Алакъаяр техническийбур тир… Исятда меркезда авур докладар ахтармишзава, са гьихьтин ятIани нетижайрикай ахпа лугьуз жеда», — лагьана  Д. Пескова.

Адан гафаралди, Москвадивни Вашингтондив гуьруьшдин нетижайрикай малуматар агакьарнава. Алава хъувурвал, Россиядинни США-дин арада веревирдер давам жеда, амма нубатдин гуьруьшдин патахъай гьелелиг тайинвал авач.

«Блумберг» агентстводи 25-мартдиз малумарайвал, Эр-Риядда США-дини Украинади ЧIулав гьуьле­ ва энергетикадин къурулушриз ягъунар кьун 30 йи­къан­ муддатда акъвазарунин месэла веревирдна.

«США-дин ва Украинадин дестейри Саудиядин Аравияда нубатдин рахунар кьиле тухузва. Идалай вилик кьве уьлкведин векилар алатай гьяддиз гуь­руьш­миш хьанай», — кхьенва чешмеда.

Махсус серенжемдикай

РФ-дин оборонадин министерстводи 24-мартдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 659 самолет ва 283  вертолет, зенитный ракетайрин 601 комплекс, пилот галачиз лув гудай­ 48312 аппарат, 21471 танк ва дяведин маса машинар, РСЗО-дин 1530 машин, артиллериядин ва маса 22946 яракь, военный махсус 33323 автомашин тергна.

Курскдин областда

Россиядин Яракьлу Къуватри Курскдин областдин мулкара ВСУ-дин кьушунар дарбадагъ авун давамарзава, хабар гузва РФ-дин оборонадин министерстводи­.

24-мартдин делилралди, суткадин муддатда ВСУ-дин 190-далай гзаф военный къуллугъчияр, пехота­дин 3 машин, женгинин бронированный 3 машин, адетдин 6 автомобиль, артиллериядин 3 яракь, 3 миномет, РЭБ станция ва пилот галачиз лув гудай аппаратар идара ийизвай пуд пункт тергна.

Курскдин мулкара женгинин гьерекатар кьиле фейи вири вахтунда 69700-далай гзаф миллетбазар тергна.

Ислягьвилин икьрар ­веревирдна

РФ-дин ва Эрменистандин МИД-рин кьилери Еревандинни Бакудин арада кутIундай ислягьвилин икьрардин текст тестикьарунин патахъай веревирдер аву­на. Идан гьакъиндай Россиядин МИД-дин сайтда кхьенва.

«Еревандинни Бакудин арада кутIундай ислягьвилин икьрардин текст тестикьарунин кар вилик финиз Москвада ганвай еке къимет къейднава», — лагьанва МИД-дин малуматда.

Къейд ийин, идалай вилик Эрменистандин премь­ер-министр Н. Пашиняна Азербайжандихъ галаз ислягьвилин икьрардал къул чIугваз гьазур тирдакай малумарнай. Адан гафаралди, ислягьвилин икьрардин проект гьазур я.

Гьазурайди — К. Ферзалиев