Ислен юкъуз РД-дин Кьил Сергей Меликова гатфарин призывдиз гьазурвилер акуниз талукьарнавай заседание кьиле тухвана. Къейд ийин хьи, гатфарин призыв 1-апрелдиз гатIунда ва 15-июлдалди давам жеда.

Гьам республика, гьамни санлай вири уьлкве патал важиблу и кардиз гьазурвилер аквазвай гьалдикай Дагъустандин военный комиссар Абдурагьман Мурадханова ихтилатна. Адан гафарай малум хьайивал, призыв кьиле тухун патал региондин кьилевайбурухъ галаз санал тестикьарнавай махсус план ава. Вири кIвалахар адан бинедаллаз тешкилзава.

Алай вахтунда республикадин во­ен­ко­матра армиядиз эвер гудай яшарив агакь­навай жегьилрин сиягьар гьазурна­ акьалтIарзава. Бязибуруз повесткаяр­ 1-25-мартдиз ракъурнавай. Абур 10-ап­рел­дилай уьлкведин Яракьлу Къуватрин жергейра къуллугъиз рекье твадайвал я.

А.Мурадханова къейд авурвал, армиядиз фидай яшарин бязи жегьилар абур официальнидаказ яшамиш жезвай адресра авачир дуьшуьшарни гьалтзава. Рес­публикадин военкомдин гафаралди, бязи­ хуьрерин администрацийрин векилар абурув (армиядиз фидай яшара авай жегьилрив) призывдин патахъай герек малуматар агакьарунив жавабдарсузвилелди эгечI­зава.

Заседанидин нетижаяр кьадайла, Сер­гей Меликова алава хъувурвал, вири муниципалитетрин военкоматрин вилик призыв чешнелудаказ кьиле тухун патал тайин месэлаяр эцигнава. Абурун арада агьалияр военный учетда эцигунин жигьетдай кьиле тухузвай кIвалахни ава.

Заседанидикай гегьеншдиз РД-дин Кьилин сайтдай кIелиз жеда.

Агьмед  Магьмудов