РД-дин Халкьдин Собранидин депутат Имам Яралиева Хуьруьгрин канвай там арадал хкунин карда вич куьмек гуз гьазур тирдакай хабар гана. Депутатди къейд авурвал, ам цIийи там кухтун патал цацар хьтин пешер алай (хвойный) тарарин къелемар чара ийиз гьазур я.
«Чахъ герек кьадар, лазим хьайитIа, мадни пара къелемар чара ийидай мумкинвал ава. Ахцегь райондин администрациядин кьилевайбурухъ галаз вири месэлаяр веревирд авурдалай кьулухъ чна абур надир Ахцегь райондив, Хуьруьгрин жемятдив агакьарда», — лагьана Имам Яралиева.
РикIел хкин, цIай кьунин нетижада еке зарар хьанвай Хуьруьгрин там арадал хкун чарасуз тирди 20-мартдиз Махачкъалада кьиле фейи заседанидал Дагъустандин Кьил Сергей Меликова лагьанай.
«Им четин месэла я, анжах ам кьилиз акъудна кIанда. И кардал илимдин векиларни (чкадин накьвадин кьетIенвилер чирун патал) желбда. Гьихьтин мярекатар кьиле тухун герек ва цIийи къелемар мус цайитIа хъсан ятIа тайинарда. Хуьруьгрин там арадал хкидай рекьер чна жагъурда. Герек пулдин такьатарни резервдин фондунай ва маса чешмейрай чара ийида», — къейдна республикадин Кьили.
Чи мухбир
