15-мартдиз Махачкъалада, лишанлу вакъиайриз талукьарнавай межлисар кьиле тухудай «Валима» залда, лезги халкьдин векилрин ифтар кьиле фена. Ана республикадин гьукумдин органрин, районрин администрацийрин векилри, алимри, журналистри, динэгьлийри, спортсменри иштиракна.
Мярекат Алкьвадар Гьасанан тIварцIихъ галай центради ФЛНКА-дихъ ва мергьяматлувилин «Леки» фондунихъ галаз санал тешкилнавай.
Ифтардал рахайбуру рамазандин вацран лайихлувилерикай, сив хуьникай мусурман патал авай хийирдикай, чи халкьдин баркаллу рухвайрин кьегьалвилерикай ихтилатар авуна.
ЦIи кьвед лагьай сеферда тешкилай и мярекатдин иштиракчийрин арада, шаз хьиз, Ислам диндиз талукьарнавай, конкурсни кьиле тухвана. Гъалибчийриз диндин алим Ямин Мегьамедован ктабар пишкешна.
Нянин азан гудай вахт хьайила вирида сив хкудна, капI авуна ва санал фу тIуьна. Къуй и пак вацра мусурманри хуьзвай сивер, гузвай садакьаяр, ийизвай хъсан крар Аллагьди кьабулрай. Амин!
Чи мухбир
