И йикъара малум хьайивал, алай йисан  1-3-октябрдин йи­къара Дагъустандин мулкунал­ СНГ-дин международный «Дагъ­лух чкаяр дурумлудаказ виликди тухун» кьвед лагьай форум кьиле фида.

И сеферда  дагъларин форумда вилик эцигнавай месэла дагълух чкаяр дурумлудаказ виликди тухунин хи­ле, экология патал важиблу къарарар кьабулдайла, муниципалитетри къугъвазвай ролдиз талукь жеда. Мярекатда СНГ-дин уьлквейрин гьукумдин органрин векилри, кар алай алимри ва вини дережадин пешекарри иштиракда.

Форумдин иштиракчийри  дагълух районрин агьалийрин  дуланажагъ хъсанарунин, уьлквейрин арада авай сергьятдин кьве патайни экIя хьанвай тIебиатдин кьетIендаказ хуьзвай мулкарин къурулуш гегьеншарунин, гьакIни  чилин кIаник квай девлетар ишлемишунин кIвалах хъсанарунин, адетдин ва инновациядин хилерин кьадар сад-садав кьадайвал туькIуьрунин, дагъдин туризмдин месэлаяр веревирдда.

Форумдал дагълара тIебиатдин гьалдал муниципалитетри гуьзчивал авунин, тамарин чкаяр тIимил хьунин ва тарар экокъурулушдиз зарар тагана ишлемишунин, гьакIни са жерге маса месэлайризни фикир гуда.

РикIел хкин, «Дагълух чкаяр  дурумлудаказ виликди тухун» сад лагьай форум  2023-йисан октябрдиз Санкт-Петербургда кьиле фенай. Алатай йисуз, Грозныйда хьайи КИФ-дал рахадайла, РД-дин Гьукуматдин Председатель Абдулмуслим Абдулмуслимова нубатдин Дагъларин форум Дагъус­танда кьиле тухун тек­лифнай.

Жасмина Саидова