И йикъара Махачкъалада кьиле фейи Дагъустандин физический культурадин ва спортдин министерстводин коллегиядин заседанидал министр Сажид Сажидова алатай йисан нетижаяр кьуна, 2025-йисуз и хел вилик тухуниз талукь планар тайинарна. Мярекатдин сергьятра аваз, Дагъустандин Гьукуматдин Председатель А. Абдулмуслимова республикадин спортдин рекье агалкьунар къазанмишнавай са шумуд касдив шабагьар вахкана. Шадвилелди хабар гуз кIанзава хьи, абурун арада СтIал Сулейманан райондин А.Ш. Бабаеван тIварунихъ галай 1-нумрадин ДЮСШ-дин тренер-муаллим Альберт Межидовни авай. Дагъустандин Кьил Сергей Меликован Указдалди адаз «Дагъустан Республикадин лайихлу тренер» лагьай гьуьрметдин тIвар ганва. Мубаракрай!
Алатай йисуз спортдин хиле кьиле тухванвай кIвалахдикай рахадайла, С. Сажидова кьилинбурукай яз къейдна:
33 агъзурдалай виниз спортсменрин иштираквал аваз, спортдин 273 серенжем кьиле тухвана;
Дагъустандин спортсменри Вирироссиядин, международный ва регионрин арада кьиле фейи акъажунра 1874 (абурукай къизилдинбур — 615, гимишдинбур — 516, буьруьнждинбур — 743) медаль къазанмишна;
Россиядин, Европадин ва дуьньядин майданра иштиракун патал РФ-дин хкянавай командадик республикадай тир 560 спортсмен кутунвай;
Дагъустанда 12 агъзур касди ГТО-дин нормативар вахкудай серенжемда иштиракна, абурукай 6203 касди нормативар вахкана;
сагъламвилин мумкинвилер сергьятламиш хьанвай 17 агъзурдалай виниз ксар физкультурадал ва спортдал машгъул хьана;
спортдин 101 объектдиз алава яз образованидин кIвалах тухудай лицензия гана, абурун умуми кьадар 278-дав агакьна (алай йисуз мадни 5 кутан хъийида);
Ватандин ЧIехи дяведин ветеранрин, СВО-дин, Афгъанистандин дяведин иштиракчийрин ва игитрин экуь къаматриз бахшна, районрин, республикадин, Вирироссиядин ва международный дережайрин акъажунар кьиле тухвана.
Коллегиядин заседанидал республикада апрелдин ва майдин варцара, Ватандин ЧIехи дяведа гъалибвал къазанмишна 80 йис тамам хьуниз бахшна, СССР-дин девирдилай инихъ сад лагьай сефер яз, Дагъустандин халкьарин Спартакиада кьиле тухудайди раижна. И теклиф гайиди Абдулмуслим Абдулмуслимов я. Сажид Сажидова премьер-министрдиз сагърай лагьана.
— Эхь, ихьтин къарар чна кьабулнава. Лазим такьатар 2025 ва гуьгъуьнин йисар патални бюджетдик кутунва. Заз Дагъустандин халкьарин Спартакиада вини дережада аваз кьиле тухвана кIанзава, — къейдна А. Абдулмуслимова.
Рагнеда Рамалданова
