Лезги чIал хуьн ва вилик тухун патал махсус фонд арадал гъунин теклиф са шумуд йис идалай вилик чи агъсакъалри­ газетдин чинилай малумарнай. Гьайиф­ хьи, маса бязи месэлаяр хьиз, и карни гьа тек­лиф яз амукьна. Чи общественный­ деятелрин, интеллигенциядин векилрин фикирдалди, ихьтин фонд арадал гъунин чарасузвал йикъалай-къуз артух жезва. Алай йисан 23-февралдиз Ярагъ-Къаз­майрал кьиле фейи «Хайи чIални меденият хуьнин рекьер» форумдал хьайи ихтилатри и кардин патахъай хъсандиз шагьидвалзава. Тайиндиз лугьун: анал къарагъарай хейлин месэлаяр пулунин такьатар галачиз кьилиз акъудиз тежедайбур я. Общественный деятель Самур Алиева ихтилат авурвал, лезги хуьрера гатун береда гьам чкадин аялриз, гьамни патарилай хквезвайбуруз лезги чIал чирдай махсус лагерар кардик кутада. Гьелелиг Лезгистандин 27 хуьре и кар гъиле кьадайбур, къаюмар ва муаллимар тайин хьанва.

Форумдал ФЛНКА-дин президент Васиф Гьасанова лезги районра авай аялрин бахчайра сифте чкадал лезги чIал эцигун герек тирди лагьанай. Ада гьакIни ФЛНКА-ди цIи «Яндекс Таржумачидиз» лезги чIал акъудунин чIехи проект гъиле­ кьунвайдакай хабар гана. Им, са шакни­ алачиз, къенин аямдихъ галаз кIвач-кIва­че аваз финин рекье къачузвай еке къадамрикай сад я.

Форумдикай за Докъузпара райондин образованидин управленидин начальник Руслан Исмаиловавай вичин фикир лугьун тIалабна.

«Къе чна иштиракай мярекат герекди, метлеблуди я, са шакни алачиз. Алай йис Мегьарамдхуьруьн районда лезги чIаланди яз малумаруни халкьдин арада чIал машгьурда. Гьар йисуз лезги са районда нубатралди лезги чIалан йис малумарун ва гьа район кIвенкIве аваз вирида санал хайи чIал хуьнин, вилик тухунин мярекатар тешкилун герек я. Им са кIусни четин кар туш. Ихьтин крари хъсан нетижайрални гъида», — лагьана ада мярекатдилай гуьгъуьниз.

РикIел хкин, форумдал рахай «Лезги газетдин» кьилин редактор Мегьамед Ибрагьимова гайи са жерге теклифрик лезги чIалан муаллимрин дережа хкажуниз, зегьметдин йисарин тежрибадилай аслу тушиз, абурун арадай хъсанбуруз пулунин пишкешар гуниз талукьдини квай. И теклифни гзафбуру хушдиз кьабулна.

Авайвал лагьайтIа, лезги чIаланни эдебиятдин муаллимриз талукь конкурс тешкилунин теклиф алатай йисарани гьам муаллимрин, гьам медениятдихъ­ни чIалахъ рикI кузвай ватанэгьлийрин патай чаз ван атайди я. Амма чи тежрибада и кар гьеле кьилиз акъатнавач. Такьатрилай гъейри, ина гьялна кIанзавай маса месэлаярни ава: кьиле тухудай тегьер ва чка, пишкешрин чкайрин кьадар ва тешкиллувилиз талукь хейлин маса крар.

Асул везифаяр кьилиз акъу­дунилай гъейри, «Лезги газетдин»­ редакцияди вичин хивез алава парни къачунва. Ихтилат, гьелбетда, редакцияди кьилди ва маса тешкилатрихъ галаз санал лезги чIал вилик тухунин, машгьурунин макьсаддалди кьилиз акъудзавай са жерге серенжемрикай физва. Вири гьевесдивди кьилиз акъудзавай мярекатар я.

Общественный деятель Навои Бутаева гьатта муаллимрин арада конкурс тухун патал пулунин такьатар чара авунин месэла къарагъарун эвелимжи камарикай сад яз гьисабна ва гуьгъуьнлай «Лезги газетдин» редакциядив 15 агъзур манат пул агакьарна. Яни им хайи чIалан муаллимрин арада гегьенш акъажунар  кьиле тухуник кьил кутунва лагьай чIал я.

Исятда вилик мад са важиблу мярекат акъвазнава — Эминхуьре гьар йисуз лезги чIалайни эдебиятдай кьиле тухузвай олимпиада. Малум тирвал, тешкилат­чийри и мярекат цIи 20-апрелдиз кьиле тухунин къарар кьабулнава.

Са шакни алачиз, хъсан, халкьдин милливилиз талукь теклифрин гуьгъуьнал крарни хьана кIанзава.

К. Ферзалиев