Жегьилди алцурарна
Гумбет райондин полициядин дежурный частуниз чкадин 38 йисан яшда авай дишегьли арза гваз атана. Адан гафаралди, алатай йисан октябрдиз таниш тушир касди ам алцурарна ва 125 агъзурни 800 манат пул къакъудна. Идакай МВД-дин пресс-къуллугъди хабар гузва.
Тади гьалда серенжем кьабулунин нетижада полициядин къуллугъчийри отделдиз Удмуртиядин 20 йисан яшда авай агьали хкана. Шак физвайда ихтилат авурвал, инвестицийрин хиле къазанмишдай мумкинвал хиве кьуналди, ада дишегьли вичин тапаррин чIалахъарна. Нетижада алцурар хьайи дишегьлиди вичин картадин делилар жегьилдиз малумарна. ЧIуру ният авай удмуртвиди картада авай вири пул вичин счетдиз ракъурна. Гуьгъуьнлай ада пулунин такьатар вичин игьтияжриз серфна.
РФ-дин УК-дин 159-статьядин 2-паюнай (лутувал) уголовный дело къарагъарнава.
Яракьар вахчуна
Дагъустандин полициядин къуллугъчийри нагьакьан крарин вилик пад атIунин мураддалди тадиз кьилиз акъудай «Яракь» серенжемдин сергьятра аваз са жерге яракьар винел акъудна.
Кьилди къачуртIа, алай йисан февралдиз кьиле тухвай серенжемдин нетижада Дагъустандин мулкара гуьлле ядай 46 яракь, жуьреба-жуьре 435 патрум, 2766 граммдин заланвал авай хъиткьиндай шей ва лишанар ядай 25 яракь вахчуна.
МВД-дин органриз ватандашри чпин гуьгьуьлдалди гуьлле ядай 31 яракь, 885 патрум, лишанар ядай 25 яракь вахкана.
Яракьар хуьзвай гзаф агьалийри абур чпиз кечмиш хьанвай мукьвабурулай амайбур ва я жагъанвайбур я лугьузва. РД-дин МВД-ди рикIел хкизвайвал, ихьтин дуьшуьшра лазим къарар кьабулун патал агьалийри чпи къайдаяр хуьзвай органриз хабар гун лазим я.
«Лезги газет»
