Миллетбазрин гьужум

РФ-дин оборонадин министерстводи малумарайвал, 10-мартдин йифиз ва 11-мартдин экуьнахъ уьл­кведин са шумуд региондин кьилел Украинадин миллетбазри ахъаяй 337 беспилотник ПВО-дин куьмекдалди яна.

Бязи СМИ-ри къейдзавайвал, Украинади гзаф кьадар беспилотникралди гьужумунин макьсад Саудрин Аравияда США-динни Украинадин векилрихъ галаз кьиле фидай рахунра Киевдин тереф «мягькемарун» тир.

11-мартдин экуьнахъ «РИА Новости» чешмеди малумарай делилралди, 337 беспилотникдикай 91 Москвадин областдин мулкарин кьилел тергна. Пилот галачиз лув гудай аппаратар ва абурун хайи кIусар аватуникди кIвалериз ва маса объектриз зарар хьана, 3 кас кьена ва хейлинбурал хирер-кьацIар хьана.

Украинадин яракьлу къуватри дронралди гьужуму­нин нетижада Подмосковьеда хьайи зиянар ОБСЕ-дин­ (Организация по безопасности и сотрудничеству в Европе) генсек Феридун Синирлиоглудиз къалурна. Къейд ийин, и юкъуз ам кIвалахдин рекьяй Москвада авай.

РФ-дин МИД-дин векил М. Захаровади вичин телеграм-каналда хабар гайивал, генсекдиз Видное шегьерда беспилотникди зарар гайи гзаф мертебайрикай ибарат кIвал акуна.

РФ-дин Президентдин пресс-секретарь Д. Пескова­ къейд авурвал, Москвадал Украинадин дронри гьужу­мунин делилди Украинадин гьакъиндай жедай рахун­риз таъсир авун мумкин я. Миллетбазри авур гьужум­ ислягьвилин рахунар кьиле тухуниз манийвал гун яз гьисабзавани лагьана хабар кьурла, Д. Пескова ихьтин­ жаваб гана: «Рахунар гьеле авач <…> Амма фикирдиз къачунвай майилвал бегьемдиз чIур хьун мумкин я». Адан фикирдалди, гьелелиг америкавияр, Украина ислягьвилин рахунар кьиле тухуниз гьазур яни, тушни, гьа кардай кьил акъудиз алахъзава.

Рахунар кьиле фена

11-мартдиз США-динни Украинадин дестейрин арада Саудрин Аравияда рахунар кьиле фена. Идакай «Газета.Ru» чешмеди хабар гана.

Вашингтонди рахунрин кьилин макьсад ислягьвилин икьрардал атун ва женгер акъвазарун яз малумарна. Чешмедин делилралди, Киевди Вашингтондин патай хатасузвилин заминвал къачунин месэла веревирд авунин ва Украина патал менфятлу тушир шартIариз манийвал гунин макьсад вилик эцигнавай.

США-дин госсекретарь М.Рубиоди идалай вилик малумарнай хьи, военный рекьяй Украинадиз куьмек гун давамар хъувун Саудрин Аравияда кьиле фидай рахунрин нетижайрилай аслу жеда.

12-мартдиз Лацу кIвалин векил К. Левитта малумарайвал, США-дин президент Д. Трампа В. Зеленский чкадал ацукьарна. «Ина, Вашингтонда, шаклу хьанвайбур гзаф авай, амма президент икьрарар кутIунунин устад я», — лагьана ада.

«РИА Новости» чешмеди хабар гузвайвал, рахунар кьиле тухунин нетижада 30 юкъуз цIай гунин гьерекатар акъвазарунин жигьетдай США-ди авур теклифдилай Украина рази хьана. Гьа са вахтунда США-ди Киевдив яракьар агакьарунин кар гуьнгуьна хтун хиве кьуна.

Мумкинвилер ­шаклувилик кутунва­

Британиядин милли хатасузвилин рекьяй илимдин пешекар У.Фриран фикирдалди, США-дин куьмек галачиз Европадин союздин уьлквейрихъ авай мумкинвилер сергьят алайбур я. Адан гафар «Лента.ру» чешмеди раижна.

«Европадин паюнин НАТО-дин военный мумкинвилер чарчел Россиядинбурухъ галаз вири хилерай гекъигиз жедайбур я, амма чарчел къалурнавай «къуват» тапанди я», — лагьанва пешекарди.

Адан гафаралди, НАТО-дин сергьятра аваз ЕС-дин уьлквейрин женгерин стратегия США-ди фадлай­ ийизвай куьмекдин такьатрилай аслу я. Алава хъувурвал, альянсдик квай Европадин уьлквейрихъ США-дин куьмек галачиз тамам тежриба авач. Идалайни­ гъейри, пешекардин фикирдалди, женгер кьиле фейи­тIа, ЕС-диз кьушунар важиблу чкайрив фад агакьарунин, гьакIни дяведин шартIара зарар эвез хъувунин месэлаяр четин акъвазда.

Идалай вилик Америкадин Хадсонан институтдин алимри чпин макъалада къейд авурвал, ЕС-дикай дуьньядин майданра США-див гекъигиз жедай хьтин нуфузлу кIватIал бажагьат жеда.

Гьазурайди — К.Ферзалиев