2025-йисуз Дагъустандай Саудиядин Аравиядиз гьаждал фин патал 10 агъзурни 500 квота ахъайнава. Россиядин регионрин арада Дагъустан и жигьетдай башчи яз ама. Идакай ТАСС-диз Дагъустандин «Марва-тур» гьаж-оператордин генеральный директор Булат Къурбанова хабар гана. Адан гафаралди, Дагъустандай гьаждал сифтегьан ксар 17-майдиз рекье гьатда.
«Алай йисуз республика патал ахъайнавай квотадин кьадарди 10 агъзурни 500 чка тешкилзава. Квота, алатай йисара хьиз, цIинин йисузни Россияда виридалайни екеди яз амукьнава. Гьаждал фидай ният авайбурун патай арзаяр мартдин эхирдалди кьабулда», — лагьана Б. Къурбанова.
Къейд ийин хьи, цIи Сулейман Керимовани 5000 кас гьаждиз рекье тун патал вичин патай пулдин такьатар чара авунва. РФ-дин мусурманрин Диндин управленидай (ДУМ) хабар гайивал, абурукай 2500 путевка Россиядин 60-далай виниз регионра, сифте нубатдай яз, дяведин махсус серенжемдин иштиракчийрин хизанрин арада пайда. Путевкайрин амай пай Дагъустандин агьалияр патал чара авунва.
Гьаж — исламдин 5 дестекдикай сад я. Гьаж авун патал мусурманар Меккедиз ва Мединадиз физва. Гьаждин асул вакъиа Исламдин кьилин кьве суварикай сад — Къурбан-байрам — я.
РикIел хкин, 2024-йисуз Дагъустандай Саудиядин Аравиядиз фин патал 10 агъзурдалай виниз квотаяр ахъайнавай.
«Лезги газет»
