Дагъустандин Кьил Сергей Меликован Указдалди, РД-дин информациядин ва печатдин Агентстводин регьбер яз Арсен Юсупов тайинарнава. Идалай вилик ада республикада милли чIаларал акъатзавай газетрин кIвалах идара ийизвай «Дагъустан» этномедиахолдингдин кьилин везифаяр тамамарзавай.
Агентстводин цIийи регьбер журналистрихъ галаз танишарунин мярекатда РД-дин Гьукуматдин Председателдин заместитель Р. Жафарова, РД-дин Кьилин ва Гьукуматдин Администрациядин Руководителдин заместитель Р. Акавова, Агентстводин виликан кьил А. Жамалутдинова, РД-дин рекъемрин рекьяй вилик финин министр Ю. Гьамзатова ва масабуру иштиракна.
Мярекатдал Р. Жафарова Арсен Юсупова СМИ-рин хиле фадлай кIвалахзавайди, адахъ и рекье хъсан тежриба ва алакьунар авайди ва Дагъустандин кьилевайбуру адан вилик эцигзавай месэлаярни адалай хъсан ери аваз кьилиз акъудиз жедайдак умудар кутунвайди къейдна.
РД-дин информациядин ва печатдин Агентстводин виликан регьбер А. Жамалутдинова къуллугъдилай вичин хушуналди элячIна. Ам «Дагъустан» этномедиахолдингдин кьиле тайинарнава.
Гьа са вахтунда РД-дин информациядин ва печатдин Агентстводин руководителдин сад лагьай заместителдин къуллугъни азад хьанва. Икьван чIавал и къуллугъдал кIвалахай Наида Мегьамедовани кIвалахдилай элячIнава. Ада кIвалах РД-дин Халкьдин Собранида давамардайвал я.
Чи мухбир
