Дербент райондин Рубас, ЛукIар, Агълаб хуьрерин ва Белиж поселокдин мектебра махсус серенжемда телеф хьайи игитрин тIварар эбеди ийидай мемориалдин кьулар ачухна. Белиждин гимназияда лейтенант Гьажиев Гьамид Гьажимегьамедовичан тIвар эбеди авуна. Мярекатда  Дербент райондин кьил Мавсум Рагьимова, Белиж поселокдин кьил Рамиз Гьабибулаева, райондин администрациядин кьилин заместителри, офицердин багърийри, муаллимри, гимназиядин аялри ва масабуру иштиракна.

Гьажиев Гьамид 2001-йисуз Белиж поселокда военный къуллугъчи  Гьажимегьамедан хизанда дидедиз хьана. 2003-йисуз Гьажимегьамед  Гьажиев къуллугъдин рекьяй Ахцегьиз ракъурна, хизанни военный частунин мулкунал яшамиш жез гатIунна. 1-11-классдалди Гьамида Ахцегьрин 2-нумрадин юкьван мектебда хъсандиз кIелна, ахпа Белиждин гимназия акьалтIарна.

Мектебда кIелзамаз, Гьамид ватан хуьзвайбурун пешедал ашукь хьанвай. Гьавиляй 2018-йисуз ам Москвадин кьилин командирар гьазурдай училищедик (МВВКУ) экечIиз фена. Гьайиф хьи, баллар бес тахьуникди ам аниз кьабулначир. КIвализ хтай ада вичин чирвилер гегьеншарна ва беден авайдалайни мягькемарна 2019-йисуз гада вичин рикIе авай мураддихъ агакьна.

Училищеда кIелдайла, ада вич зигьин авай, кар алакьдай курсант яз къалурна. Чешнелу курсантди Москвадин Яру майдандал кьиле фейи парадра кьве сеферда иштиракна.

2023-йисан апрелдиз Гьамида кIел­завай курс училищедай вахтундилай­ вилик ахъайна. Жегьил лейтенантар­ гьарниз акъатна. Гьамидаз Южно-Саха­линскд­а авай военный бригададин мотострелковый взводдин командирвиле къуллугъ авун кьисмет хьана. Къуллугъда ам  «Женгинин гьунарлувиляй» медалдиз лайихлу хьана. Гьа и йисан июлдиз Гьамидан гъилик квай взводни маса частарихъ галаз санал махсус серенжемда иштиракиз ракъурна.

Гьамидан дахдин гафаралди, виридалайни къати женг Гьамидан взводди октябрдин вацра Донецкдин областдин Степной поселокда тухвана. Ротадин ­командный пунктунал миллетбазрин­ БПЛ-ди гьужумайла, ана авай ротадин ва кьве взводдин командиррал залан хирер хьана. Женг къвердавай къати жезвай. Малум хьайивал, чибурал гьужумзавайбур миллетбазриз куьмекзавай полякар тир. ЧIехи командованидиз арадал­ атанвай гьаларикай хабар гайила, вахтуналди ротадин командирдин везифаяр тамамарун Гьамидал тапшурмишна. Ада залан хирер хьанвайбур саламат чкадиз агакьарунин эмир гана, къуватар дуьз чкайрал тайинарна, миллетбазрихъ галаз женг тухун давамарна. Гуьзлемиш тавур патахъай Гьамид алай чкадал миллетбазри БПЛ-дай гранат вегьена.

Гьамид госпиталдиз хкайла, адан беденда акIанвай иридакай кьуд кIус  акъудайла, уьмуьрдиз хаталувал авай кьвед туна. Хъиткьиннавай кIусар акурла, духтурар ам чан алаз амукьунал мягьтел хьанвай. Ростовдин, Камышиндин госпиталра сагъламвал мягькемар хъувуна,  кIвачел акъваз хъийиз цIуд варз хьана.

Гьамидавай кIвале акъвазиз хьанач, бедендик ракьун кьве кIусни кумаз, ам 2024-йисан сентябрдиз мад СВО-диз хъфена. 7-сентябрдиз командованидин эмирдалди лейтенант Гьамид Гьажи­ев­ гьужумдай взводдин командирвиле­ тайи­нарна. 10-сентябрдиз Гьамидан взводди кьиле фейи женгерин нетижада­, чпиз магьрумвилер тагана, миллетбазрин ­да­яхдин пункт вахчуна, пуд касди есирви­ле кьуна. 14-сентябрдиз командирди аскерар кьве дестедиз пайна, кьве даяхдин пунктунал гьужумна.

И юкъуз кьве патайни магьрумвилер гзаф хьана, — лугьузва игитдин дах Гьажимегьамеда. — Кьвед лагьай дестедин гьалар четинзаваз акурла, Гьамид абуруз куьмек гуз фена. Ам алаз физвай Тягач — МТЛБ-диз миллетбазри гуьлле гайила, ада цIай кьуна. Гьамидаз гена хасаратвал хьанач. Ада яхдиз вичин взводдин юлдашрин патав фин давамарна. Къати ягъунрин женгера са тIимил кичI акатнавай аскеррик, куьмекдиз атай командир акурла, руьгь акатна. Дестедик квай Андрей Борисовахъ галаз Гьамида аскерар женгиниз къарагъарна, гьужум давамарна. Женгина А. Борисов телеф хьана. Гьамидан кьве кIвачихъни хъиткьинай гранатдин кIусар галукьна. Кьве патайни къати ягъунар финиз килигна, ам хкидай мумкинвал авачир. Йифиз душманриз ам алай чка тепловизордай акуна, адал гранат гадарна. Эхиримжи нефесдалди Ватандиз вафалу хьана, ам игитвилелди телеф хьана.

Мярекат ачухдайла, М. Рагьимова­ лагьайвал, игитди вичин аскервилин­ буржи жуьрэт­л­у­вилелди тамамарна. «Ислягьвал ва чи уьмуьр хуьн патал ада виридалайни багьади — вичин чан гана. Чи буржи­ акьалтзавай несилдив игитрин викIегьвилер рикIелай алудиз тун тавун ва хуьн я…», — лагьана ада.

Гьамид Гьажиев «Женгинин гьунарлувиляй», Суворован медалрин, «Жуьр­этлувиляй» ордендин ва республикадин жемиятдин  «Дагъустандин Игит» тIвар­цIин сагьиб я.

Къагьриман  Ибрагьимов