Ахцегьрин 9 йисан школада виликан ученикрин, СВО-да Донбассдин чилел Ватан патал игитвилелди чанар гайи кьегьал рухвайрин — Балагъа Гьажиеван, Васиф Азизован ва Жабраил Кисриеван — пак къаматар эбеди авунин мярекат кьиле фена. Школадин цлал абурун къаматар алай мемориалдин кьулар игит рухвайрин диде-бубайрихъ галаз Ахцегь райондин регьбер Абдул-Керим Палчаева ачухна.
Мярекатда школадин муаллимри, аялри, райондин кьиле авай ксари, жемиятдин тешкилатрин, СМИ-рин векилри ва игит рухвайрин диде-бубайрини багърийри ишитракна.
«Жуьрэтлувиляй» орденриз лайихлу хьанвай игит рухвайрин уьмуьрдинни женгинин рекьерикай райондин культурадин управленидин начальникдин заместитель Сулейман Сулейманова ихтилатна.
— Къе чна гуьгьуьллудаказ дяведиз фена, чи ислягь уьмуьр, хушбахт гележег патал жегьил чанар къурбанд ийизвай рухвайриз кьил агъузна, икрамзава. Сагърай лугьузва гьахьтин игитар тербияламишай диде-бубайризни школадин муаллимриз. Чи везифа игит аскеррин баркаллу тIварар ва крар рикIелай алуд тавун, абурун чешнейралди акьалтзавай несил тербияламишун я. Гьа са вахтунда рагьметлубурун хизанриз алакьдай вири куьмекар гуз чун гьазур я, — къейдна Абдул-Керим Нажмудиновича.
Ахцегь, Докъузпара ва Рутул РВК-дин комисcар, подполковник Рафик Мегьамедова СВО-дин игитрин диде-бубайризни мукьва-кьилийриз башсагълугъвал гана, аскерар рикIел хуьнин лишан яз, са декьикьада кисна акъвазун малумарна.
Мярекатдал гьакI школадин директор Фарида Тажибова, игит рухвайрин классрин руководителар хьайи Умагьан Мегьамедова, Мая Жалилова, Гуьльнара Арзуманова, аскер Жабраил Кисриеван стха Рагьим Кисриев ва масабур рахана. Абуру СВО-дин игит аскерри школада кIелай йисар чими келимайралди рикIел хкана, диде-бубайриз сабур-теселли гана. Игитрин тIварар эбеди авунай ва герек куьмек теклифунай райондин кьил Абдул-Керим Палчаеваз чухсагъул лагьана.
Мярекат школьникри ватанпересвилин манадин шиирар кIелуналди ва СВО-дин игитрин мемориалрив цуьквер эцигуналди акьалтIна.
Д. Шерифалиев
