Идалай виликан вад йисан кьадардив гекъигайла, алай вахтунда республикада гуьгьуьллубурун кьадар пуд сеферда артух хьанва. Абуру жуьреба-жуьре хилера кьилиз акъудзавай къени крарин кьадарни гзаф жезва.

Дагъустан Республикадин жегьилрин крарин рекьяй министрдин заместитель Фарман Меликова къейд авурвал, гуьгьуьл­лубурун кIвалах лап герекди ва важиблуди я. Абуру «Къени крарин регион» конкурс­да, «Чун санал ала» проектда гьевесдивди иштиракзава. Куьмек герек авай гьар  садаз гъил яргъи ийизва.

«Дагъустандин гуьгьуьллубур» АНО-дин директор Агьмед Абдурагьманова лагьайвал, дяведин махсус серенжемда иштиракун патал желб авур (мобилизация) 4300 касдив сифте нубатда герек къвезвай шейэр агакьарна. Ватандин итижар хуьзвай вири аскеррин хизанриз куьмек гузва. Рес­публикадин шегьеррин ва районрин гуьгьуьллубуру СВО-дин иштиракчияр патал 500 тонндилай виниз гуманитарный куьмекдин пар кIватIна.

— За гуьгьуьллубурун гьерекатда 2014- йисалай иштиракзава, — лугьузва А. Аб­ду­рагьманова. — Къе республикада и важиблу ва менфятлу кардал 66 агъзур кас машгъул жезва. Чун виридаз алакьдай ­куьмек гуз гьазурбур я. Чаз вилералди ­аквазва хьи, лап гъвечIи къени карди­ни  инсанрин уьмуьрда хъсанвилихъ дегишвал твазва. Сада-садаз куьмек гун, къени кардик къуьн кутун, гьатта дуьз меслят къалурунни ахпа чIехи метлебдиз эл­къвезва.

Гуьгьуьллубурун гьерекат ЧIехи Гъалибвилин 80 йисан юбилейни лайихлу­даказ къаршиламишун патал гьазур хьанва. Алатнавай кьве вацра абуру респуб­ликадин саки вири шегьерра ва районра­ цIудралди мярекатар кьиле тухванва. ­Виридакай талгьайтIани, бязибур къейд ­ийин.

Агъул райондин жаванри СВО-дин иштиракчийриз гуьгьуьлар хкаждай чарар кхье­на. СтIал Сулейманан районда «Зарница» къугъун тешкилна. Кьурагь районда ­далу патан зегьметчийрив шабагьар вахкана. Дербент райондин школайра «Игитар чи патав гва» лишандик кваз жуьр­этлувилин, Ахцегь райондин школай­ра «Ватан хуьзвайбур» тарсар тухвана. Къули районда гуьгьуьллубурун центр ачухна. Казбек районда «Гъалибчийрин невеяр» акция тухвана. Гуниб районда гуьгьуьллубуру СВО-дин иштиракчияр тебрикна. Къизляр шегьерда аялар СВО-дин иштиракчи Александр Карановахъ галаз гуьруьшмиш хьана. Бабаюрт райондин гуьгьуьллубуру СВО-дин иштиракчияр патал герек шейэр кIватIна ва чкадал рекье туна. Новолак районда жаванри ва жегьилри аскеррин сурар къайдадиз гъана. Буйнакскдин райондин школайра «Чи йикъарин игитар» темадай тарсар тухвана…

Дагъустандин гуьгьуьллубуру чпикай къени краралди, гзаф кьадар мярекатра иштиракуналди, Россиядин саки вири регионриз чирнава. Республикада регионрин арада сифте яз гуьгьуьллубурун крарикай ихтилатзавай, абурун кьилин макьсаддикай малуматар гузвай семинарарни тешкилна.

«Россия — зи тарих» паркуна респуб­ликадин  школьникрихъ,  студентрихъ  галаз датIана мярекатар кьиле тухузва, абур гуьгьуьллубурун крарихъ галаз танишар­зава.

Гуьгьуьллубурун гьерекатдик къени ниятар авай гьар садавай экечIиз жеда. Иниз кьетIен бажарагъ, пешекарвилин алакьунар герек къвезвач. Кьилинди, куьмек гудай къаст хьун я.

Хийир  Эмиров