Дербентдин инновацийрин медицинадин колледжда «Жуьрэтлувиляй» кьве ордендин сагьиб, РФ-дин милли гвардиядин федеральный къуллугъдин махсус везифайрин дестедин командир, краповый беретдин сагьиб Руслан Примоваз мемориалдин кьул ачухуниз ва медколледждиз кьегьал хцин тIвар гуниз талукьарнавай мярекат хьана.

Ана РД-дин Гьукуматдин Председателдин заместитель Рамазан Жафарова, РД-дин Кьилин ва Гьукуматдин Администрациядин руководителдин заместитель Наип Сапиханова, РД-дин Кьилин меслятчи Зарема Магьмудовади, образованидин ва илимдин, жегьилрин крарин рекьяй министрар тир  Ягья Бучаева ва Камил Саидова, Дербент шегьердин ва Мегьарамдхуьруьн райондин кьилер — Агьмед Къулиева, Фарид Агьмедова, Россиядин дишегьлийрин Союздин Дагъустандин отделенидин председатель, аскеррин хизанрин комитетдин руководитель Интизар Мамутаевади, Росгвардиядин махсус везифайрин дестедин командир Юрий Указова, депутатри, игитдин багърийри, студентри ва муаллимри иштиракна.

Куьруь къейд.

Руслан Примов 1992-йисан 13-октябрдиз Мегьарамд­хуьруьн райондин Та­гьирхуь­­руьн-Къазмай­рал дидедиз хьа­на. Юкьван­ школа акьал­тIар­на. 2010-йисуз ам Пермь шегьерда авай МВД-дин институтдик экечIна. Анаг акьал­тIарайла, Россиядин регионрин къенепатан кьушунрин частара жуьреба- жуь­ре жавабдар къуллугърал хьана. Махсус военный серенжем гатIунай йикъалай, махсус везифайрин дестедин командир тир.

Мярекат РФ-дин ва РД-дин гимнар­ тамамаруналди ачухна. Р. Жафарова­ къейд авурвал, Россиядин Президентдин Указдалди 2025-йис Ватан хуьдайбурун йис яз малумарнава. СВО-дин игит Руслан Примован тIвар и йисуз эбеди авун лайихлу кар я. Мегьарамдхуьруьн райондин Тагьирхуьруьн-Къазмайрин агьалидин тIвар неинки­ вичин Ватанда, гьакI вири Россияда­ни­ машгьур я. Ам, чандилайни гъил къа­чуна, кIевевайдаз гьи декьикьада хьайи­тIани жуьрэтлудаказ, дирибашдиз куьмек гайи, масадбур къутармишай инсан тир. Ам телеф хер алай аскер къутармишдайла хьана. Руслан Примов Ватан кIан хьунин, ам хуьнин чешне я.

Я. Бучаева Россия, Дагъустан ва вичин хизанни машгьур авур игит хциз лайихлу тербия гайи дидедиз — Аида­ Къараханова-Примовадиз сагърай лагьана. Ада гьакIни хизандихъ галаз алакъа хуьзвай ва куьмек гузвай СВО-дин игитдин женгинин юлдашрилай ра­зивал къалурна ва давамарна: «Чи игитар гьамиша чи рикIера чахъ галаз жеда. Зун инанмиш я хьи, чи ватанэгьлидин ватанпересвал акьалтзавай несилдин рикIера куькIвена амукьда.  Ватандин ЧIехи дяведин игитрин кьегьалвилин чешнедалди миллионралди инсанриз гьикI тербия ганатIа, гьакI алай несилни Руслан Примов хьтин къагьриманрин чешнедалди чIехи жеда».

Юрий Указова Р. Примов женгинин везифаяр эхирдалди тамамарай халис спецназовец, дирибаш аскер тирди къейдна. «Руслан рикIе хуьн, чна СВО-да телеф хьайи вири игитар рикIе хуьзвайдай я. Чи рикIера амай кьван гагьди, абурал чан алама».

Агьмед Къулиев. —  Гьуьрметлу Аида­ вах, хва халис ватанперес яз тербияла­мишунай чна квез кьадар авачир кьван сагърай лугьузва. Куьн гьамиша­ чи фикирра ава ва чун, гьи вахтунда хьайи­тIани, квез куьмекар гуз гьазур я. СВО-да Ватандин итижар хуьз, 79 кас игит дербентвийри чпин чанар гана. Абурун къаматар, кьегьалвилер эбеди яз амукьда.

Мемориалдин кьул Наип Сапихано­ва ва Росгвардиядин Махачкъалада авай бригададин командир Дмитрий Чистякова ачухна. Ахпа кIватI хьанвай­буру анал цуьквер эцигна. Аскерри яракь­рай салют гана, студентри цавуз шарар ахъайна.

Мярекатдиз кIватI хьанвайбур колледжда Руслан Примован игитвилерин ва уьмуьрдин рекьериз талукьарнавай музейдизни килигна.

Экскурсиядилай гуьгъуьниз мярекат колледждин конференцийрин залда давам хьана.

Колледждин студентри, Руслан Прим­овалай  чешне  къачуна  лайихлу­да­каз, чешнелудаказ кIелда лагьана, кьин кьуна.

И юкъуз колледжда Руслан Примован шикил уьмуьрдиз ва женгинин рекьериз талукь делилар алай «Игитдин партани» ачухна.

Игитдин диде Аида Къараханова-Примовади мярекатдик къуьн кутур гьар садаз ва кьилди медколледждин директордиз сагърай лагьана.

Къагьриман  Ибрагьимов