Шад жедай кар я, лезги чIалаз, эдебиятдиз, публицистикадиз талукьарнавай жуьреба-жуьре мярекатар, конкурсар эхиримжи вахтара гзаф тешкилзава. И кардихъ себебни авачиз туш: акьалтзавай несилдин арада хайи чIал чизвайбурун кьадар, гьайиф хьи, къвердавай тIимил жезва.
20-февралдиз ДГПУ-дин Дагъустандин филологиядин факультетда студентрин арада лезги публицистикадай цIи пуд лагьай сеферда яз кьиле фейи конкурсдин макьсад чIалахъ галаз алакъалу пеше хкянавайбурун арадай лезги чIалал яратмишдай, чпихъ бажарагъ авай, гележегда милли газетрани журналра, телевиденидани радиода кIвалахдайбур винел акъудун, абурук руьгь кутун, алакьдай куьмекар гун я.
Алатай йисара хьиз, и сефердани конкурс ФЛНКА-ди, Алкьвадар Гьасанан тIварцIихъ галай медениятдинни марифатдин маканди ва «Лезги газетдин» редакцияди санал тешкилна.
Ана ДГУ-динни ДГПУ-дин филологиядин, Дагъустандин филологиядин факультетрин (гьам журналиствилин, гьам муаллимвилин хиляй чирвилер къачузвайбуру) 1-5-курсара кIелзавай 22 студентди иштиракна. Абуруз пуд жуьредин тапшуругъар ганвай: лезги публицистикадай тестер, Ватандин ЧIехи дяведиз талукь яз куьруь макъала кхьин ва ганвай текст къайдадик кутун (редактирование).
Конкурс башламиш жедалди вилик адан шартIарикай «Лезги газетдин» кьилин редактордин заместитель Куругъли Ферзалиева ихтилатна. Студентар тебрик авуналди, конкурсдин макьсадрикай галай-галайвал жемиятдин деятель Садикь Гьасанова, ФЛНКА-дин Советдин член Гьуьсен Шагьпазова ихтилатна, «Дагъустан» ГТРК-дин лезги радиодин мухбир Сергей Абумуслимова агалкьунар хьун алхишна.
Студентрин кIвалахриз «Лезги газетдин» кьилин редактор, жюридин председатель Мегьамед Ибрагьимов кьиле авай дестеди къимет гуда. Виридалайни гзаф баллар къазанмишай вад студентдиз пулунин пишкешар, дипломар ва лезги чIалал кхьенвай ктабар багъишда. ИкI, 1-чка кьурдаз — 25 агъзур манат, 2-чка кьурдаз — 20 агъзур манат, 3-чка кьурдаз — 15 агъзур манат, 4-чка кьурдаз — 10 агъзур манат, 5-чка кьурдаз 5 агъзур манат гудайвал я. Нетижаяр мукьвара кьада, шабагьар шад гьалара «Лезги газетдин» редакцияда вахкуда.
Чи мухбир
