Макроналай Трамп чIалал гъиз алакьнач

Украинада къалмакъал акьалтIайдалай кьулухъ­ аниз Европадин военнияр ракъурунин жигьетдай Франциядин президент Э. Макроналай США-дин пре­­зидент Д. Трампан патай «куьмек» къазанмишиз алакьнач. Къецепатан чешмейрал асаслу яз, идакай «РИА Новости» сайтди хабар гузва.

Идалай вилик бязи чешмейри Великобританиядинни Франциядин кьилери Украинада женгер куьтягь хьайидалай кьулухъ аниз «ислягьвал арадал гъидай къуватар» ракъурунин месэла чинебадаказ веревирдзавайдакай малумарнай.

Америкадин президент Украинадиз военный рекьяй куьмекар гудай ва я аниз кьушунар рекье твадай фикирдал алач, хабар гузва «РИА Новости» чешмеди.

Амма Франциядин президент Э. Макрона Д. Трампахъ галаз кьиле тухвай суьгьбетда Украинадиз Париждини Лондонди гузвай куьмекдин тереф Вашингтондини хуьн патал алахъунар авуна.

26-февралдиз СМИ-рин такьатри раижайвал, Трампа Россиядиз акси яз малумарнавай санкцияр са мус ятIани къуватдай вегьеда лагьана, амма гьелелиг и кар авунвач.

Россиядин къецепатан разведкадин къуллугъдин (СВР) пресс-бюроди идалай вилик хабар гайивал­, Украина дяве авуниз ярамиш гьалдиз хкун патал РагъакIидай патаз гуя ислягьвал хуьдай 100 агъзурдав агакьна аскерар и уьлкведиз ракъуриз кIанзава. СВР-да гьисабзавайвал, им чара республика дяведалди кьур мисал жеда.

РФ-дин Президентдин пресс-секретарь Д. Пескова къейд авурвал, ислягьвал арадал хкидай аскерар анжах къалмакъалдик квай кьве уьлкведин ихтиярдалди ракъуриз хьун мумкин я.

Еревандив жаваб ­агакьна

Эрменистанди ислягьвилин икьрардин проектдай авунвай теклифрин патахъай Бакудин патай Еревандив жаваб агакьнава. Идакай «РИА Новости» чешмеди хабар гузва.

«Ислягьвилин икьрардиз талукь яз Азербайжандин патай чав жаваб агакьнава, амма маса хилериз талукь теклифар, кьилди къачуртIа, коммуникацийрал алай сергьятар алудуниз, яракьрал саналди гуьзчивал авуниз талукьбур гьелелиг жаваб авачиз амукьзава», — лагьана Эрменистандин МИД-дин пресс-секретарь А.Бадаляна.

Къейд ийин, 2022-йисуз, Россиядин, США-дин ва ЕС-дин арачивал аваз, Ереванни Баку гележегдин­ ислягьвилин икьрар веревирд авунив эгечIнай. 2023-йисан майдин эхирра Эрменистандин премьер Н. Пашиняна советрин девирдин часпарра Азербайжандин аслу туширвал (Къарабахни кваз) хиве кьаз гьазур тирдакай лагьанай.

Тек са мумкинвал

США-дин ЦРУ-дин (центральное разведывательное управление) виликан аналитик Л. Жонсонан фикирдалди, В. Зеленскийдиз чан алаз амукьунин жигьетдай анжах са мумкинвал я амайди. Ада «Judging Freedom» ютуб-каналда лагьай гафар «Лента.ру» чешмеди раижнава.

Л. Жонсона Зеленский уьлкведай экъечIун лазим яз гьисабзава. «Эгер кьуьзуь жедалди яшамиш жез кIанзаватIа, ада гьукум тун ва далдаламиш жедай чка жагъурун лазим я», — лагьана ада.

Бегьемсуз теклиф

Украина ядерный яракьдалди таъминарунин патахъай авур теклифдиз США-дин госсекретарь Марко Рубиоди ихьтин жаваб гана: «Абурун патай атанвай и теклиф садани гьакъикъиди яз бажагьат гьисабзава». Адан гафаралди, США-ди им бегьемсуз теклиф яз гьисабзава. Ада Америкадин са порталдиз гайи интервьюда лагьанвай гафар «РИА Новости» чешмеди раижнава.

Идалай вилик В.Зеленскийди къейднай хьи, эгер Украина НАТО-диз кьабул тавуртIа, ядерный яракьдалди таъминаруни уьлкведиз хатасузвилин заминвал гудай.

США-дин госсекретарди ихьтин истемишунар гьа­къикъатдивай гзаф яргъа авайбур я лагьана. «Ядерный яракьар авай уьлквеяр гзаф ваъ, тIимил хьун герек я», — лагьана ада.

Гьазурайди — К.Ферзалиев