Ам девлетлу, савадлу хизанда чIехи хьана, вичин чIехи бубадин медресада чирвилер къачуна. Ада лезги ва араб чIаларал шиирар теснифдай, чуьнгуьрдихъ галаз мелера-межлисра манияр лугьудай, гьавиляй ам Мазан Къемер хьизни машгьур тир.

Бубадиз Къемер гужуналди такIан касдиз, яшлу кавхадиз, гъуьлуьз гуз кIан хьайила, ам хайи Миграгъай катна, Къубадиз кIани гада Султалидин патав фена. Ина абуру хизан кутуна. Ирандин шагь Сефевидрин Жуьнейд шейхдин кьушунрихъ галаз лезгийрин дяведа са женгина Султалини Къемер кьведни телеф хьана. Миграгъай тир аскерри абурун мейитар хуьруьз хкана, жегьилрин рикI хьайи, патав булах гвай Эбеш тарцин кIаник кучукна. Гьа икI Мазан Къемер Къилинж Къемер хьизни машгьур хьана.

Къемеран чIалар алатай асирдин 60-йисарани Миграгъа яшлу ксарин рикIел аламай. Ашукь Шиназ Гьезерчиди абур чуьнгуьрдихъ галаз лугьудай. Къемерахъ «Кузва лагь, гум акъатиз…», «Ишехь, Къемер, чуьнгуьрд симер…», «Кьакьан синел акьахдайла…» ва маса шиирар ава. Сифте яз абур И. Къазиева кхьена, Абдул Фетягьа печатдиз акъудна.

Къадим девирдин шаир рушан къамат А. Къардашанни М. Жалилован шиирра, Гь. Къурбанан «Къилинж Къемер» романда ачухарнава.

Миграгъ Къемеран чIалар 2014-йисуз акъатай «РикIелай тефидай манияр» кIватIалда алатай девиррин Миграгъай тир мад кьве шаирдин, Сфи-эфендидин ва Мардалидин, шииррихъ галаз гьатнава. Абурукай бязибур А. Къардаша урус чIалаз элкъуьрна, 2004-йисуз акъатай «Кеферпатан Кавказдин халкьарин поэзия» кIватIалдикни акатнава.

«Лезги газетдин» 2025-йисан 7-нумрадай.