«Бес рикIелай алатдани?..»
Алатай йисуз Кьасумхуьрел кардик квай «Куьредин ярар» культурадин центради Ф. Фетялиеванни Ф. Фетялиевадин шииррин «Дагъдин булахар» ктаб акъудна. Фетяли Фетялиев 1947-йисуз СтIал Сулейманан райондин Хуьпуьхърин хуьре дидедиз хьана. Школа акьалтIарай ада армиядин жергейра къуллугъна. Хтайла, ам вичин хуьруьнви руш Фатимадал эвленмиш хьана. Жегьил хизан, а девирда гзафбуруз адет хьанвайвал, кьил хуьз, Туьркменистандиз фена, Челекен шегьерда бине кутуна. Фетялиди Ашхабадда милициядин школада кIелна, яргъал йисара къайдаяр хуьдай органра кIвалахна. Абуру чIехи хизан кIвачел акьалдарна. Алай вахтунда абур СтIал Сулейманан райондин Агъа Макьарин хуьре яшамиш жезва. Фетялиеврихъ жегьил девиррилай теснифнавай шиирар ава, абуру гилани кхьизма, амма дуьздал абур акъудзавачир. «Дагъдин булахар» ктаб гьазуриз пенсионерриз абурун хуьруьнви, Дагъустандин лайихлу муаллим Ш.Д. Фейзуллаева куьмекна. КIелзавайбурун фикирдиз чна и ктабдай шиирар теклифзава.
* * *
Бес рикIелай алатдани
Заз фу гайи багьа гъилер?
Бес рикIелай алатдани
Заз килигай чIулав вилер?
Бес рикIелай алатдани
Вахъ галаз фей яргъи уьмуьр?
Акваз-такваз яш жердавай
Агатзава зав къе фикир.
Вахтар физва, хабар такьаз,
Къари, къужа жезва кьуьзуь.
Мал-девлетар герек туш чаз,
Чи уьмуьрдал я чун рази.
Дагъустан
Шумудни са миллет авай къужахда,
Фан тике на хушвилелди уртахда.
Мугьман шаддиз кьабулда на утагъда,
Чан зи ватан, дагъдин уьлкве Дагъустан.
Вун я зи рагъ-варз, вун зи дамах, зи чан я,
Вун жегьилрин, вун гуьзелрин макан я,
Гьар са нямет, емиш авай бустан я,
Чан зи дамах, диде-ватан Дагъустан.
Ви къужахда хайи инсан абад я,
Зун — бала, вун диде хьунал зун шад я,
Вун ислягь, девлетлу хьун зи мурад я,
Зи играми азиз ватан Дагъустан.
Ярар-дагъдиз
Са багъ-бахча къвеч вахъ галаз,
Гуьрчегвилин пай ганва ваз,
Килигдай кьван, килигиз кIанз,
Жеда хьи ашкъи, Ярар-дагъ.
Махпур хьтин къацу дере,
Чубанри кутада бере,
Суьруьярни жерге-жерге
Мугьман жеда ваз, Ярар-дагъ.
Ви яйлахра атирдин ни,
Ви чубанар тахьуй кьуьзуь.
ХъуьтIуьз ви кьил жеда рехи,
Шалбуздиз ухшар Ярар-дагъ.
Гуьзел я вун экуьн бере,
Ракъинин нур гьатна пеле.
Уьмуьрлух амукьда рикIе
Вун акур касдин, Ярар-дагъ.
«Лезги газетдин» 2025-йисан 6-нумрадай.
