18-февралдиз РД-дин Гьукуматдин Председатель Абдулмуслим Абдулмуслимов А. Тахо-Годидин тIварцIихъ галай РД-дин милли музейда СВО-дин игитриз бахшна ачухнавай «Донбассдин цIивин» выставкадиз килигна. Премьер-министрдихъ галаз санал РД-дин культурадин министр Зарема Бутаевани, Россиядин Игит Нурмегьамед Гьажимегьамедован диде, Махачкъаладин 54-нумрадин мектебдин директор Сапижат Мазаевани художник Сергей Марченкодин графикадин кIвалахрихъ галаз таниш хьана.
«Куь яратмишунар неинки графикадин суьретар, гьакIни чи аямдин халисан игитар хьайи инсанрин къенепатан алем ва руьгьдин къуват къалурзавай дерин, таъсирдай агьвалатар я…», — лагьана А. Абдулмуслимова.
Са шикилдай СВО-да РФ-дин сад лагьай Игит Н. Гьажимегьамедов аквазва. Адан патав вичин чешнедалди халисан дагъви дишегьлидин дурумлувал къалурзавай кьегьалдин диде С. Мазаевадин шикилни гва.
Чи мухбир
