РД-дин Гьукуматдин Председатель Абдулмуслим Абдулмуслимован регьбервилик кваз кьиле фейи ветеринариядин комитетдин коллегиядин заседанидал са жерге месэлаяр веревирдна, гьа жергедай яз Каспийскда ва республикадин маса муниципалитетра куьчейра гьатнавай иесисуз кицIерихъ галаз алакъалудини. Идакай «Лезги газетдиз» РД-дин Гьукуматдин пресс-къуллугъди хабар гузва.
«Месэла гьял тавуна амаз са шумуд йис я. Республикадин кьиле авайбуруз агьалийрилай гзаф арзаяр къвезва. Гуьзчивилик квачир гьайванри инсанар кьунин, гьар жуьре азарар чукIурунин къурхулувал арадал гъизва. Зун гьеле инсан кьиникьал гъайи дуьшуьшрикай рахазвач, гьахьтин дуьшуьшарни республикада хьана», — лагьана премьер-министрди.
Ада и жигьетдай хъсан тушир гьалар авай Каспийск мисал яз гъана. Гьа са вахтунда Дербентда кицIер гуьзчивилик кутун патал серенжемар кьабулнава. Кьилди къачуртIа, ина иесисуз 180 кицI хуьз жедай махсус чка кардик кутунва.
А. Абдулмуслимова ветеринариядин къуллугъдиз куьчейра авай гьайванрив эгечIунал гуьзчивал артухарунин тапшуругъ гана.
Салим Салимов
