Таъминарзавай къайдаяр

2025-йисан январдилай СФР-дин Да­гъустанда авай отделениди инвалидвал авай агьалияр ТСР-ралди (технические средства реабилитации) кьве къайдада таъминарзава. Идакай Да­гъустандин яшайишдин фондунин сайтда хабар гузва.

Кьилди къачуртIа, чешмеди кхьизвайвал, винидихъ къалурнавай муддатдилай инвалидвал авай агьалийривай ТСР бюджетдин гьисабдай кьве жуьреда къачуз жеда — СФР-дин Дагъустанда авай отделенида гьукуматдин «маса къачунин» серенжем (государственная закупка) кьиле тухуникди гьакъикъи жуьреда ва электронный сертификатдин куьмекдалди.

Къейдзавайвал, гьакъикъи жуьреда махсус тадарак заказ авур дуьшуьшда ам вахкунин муддат кардик квай гьукуматдин икьрар хьунилай аслу жеда. Эгер а икьрар кутIуннаватIа, техникадин такьат гуни 15 югъ ва я паллиативный начагъбур патал 7 югъ кьада.

Электронный сертификатдин артуханвал вуч ятIа СФР-дин Дагъустанда авай отделенидин управляющийдин везифаяр вахтуналди тамамарзавай А. Загьидовади лагьана. Адан гафаралди, электронный сертификатди ТСР са кьадар куьруь муддатда къачудай мумкинвал гуда. Алай вахтунда ихьтин сертификат 10 йикъан муддатда туькIуьрзава, ам къуватда амукьунин муддат лагьайтIа, са йис я.

Кардик квай МИР карта аваз хьун электронный сертификат къачунин ­важиблу шартI я. И кар, маса къачузвай затI къейдзавайла, электронный сертификатдин сагьиб тайинарун ва казначействодай пулдин такьатар метягь маса гузвайдаз ракъурун патал герек я.

Хабар гузвайвал, гьакIни ТСР эвез авуниз талукь арза кхьинин дегиш­вилерни къуватда гьатнава. Гила кIва­лахдик квай техникадин тадарак ишлемишдай муддат эхирдал къвез ва я ТСР къачун патал чара авунвай такьатрин кьадар куьтягь жез 60 югъ амаз документар вугуз жеда, виликдай хьиз, абур ишлемишунин муддат акьалтIайла, — ваъ.

Чешмеди раижзавай къейдерай­ гъа­вурда акьазвайвал, эгер ТСР 2024-  йисан эхирдалди жуван хсуси пулунихъ къачунваз хьайитIа, и дуьшуьшда СФР-дин Дагъустанда авай отделениди виликан къайдада хьиз тадарак къачунвай касди авур харжияр эвез хъийида.

Чешмеди хабар гузвайвал, гьам гьакъикъи жуьреда ва гьамни электронный сертификатдин куьмекдалди ТСР къачун патал арза «Госкъуллугъар» порталда, СФР-дин Дагъустанда авай отделенидин муьштерийриз къуллугъдай сервисда ва я МФЦ-да вугуз жеда.

Идарадин сайтда малумарна­вай­вал, эгер агьалийрихъ винидихъ вичи­кай ­ихтилат физвай месэладин жигьет­дай суалар амаз хьайитIа, абу­рувай­­ СФР-дин Дагъустанда авай от­де­ленидин «контакт-центрадиз» зенг ийиз­ жеда, те­лефондин нумра — 8 (800) 100-00-01 (зенг пулсузди я, ислен йикъа­лай хемисдалди сятдин экуьнин 9-далай нянин сятдин 6-далди).

Кьадар артух хьанва

«Дагъустан» РИА-ди раижзавай делилрай аквазвайвал, «Кеферпатан Кавказдин Россетар» компанияди 2024-йисуз цIийиз кутунвай саки 5 агъзур объект электроэнергиядалди таъминарна.

Чешмедин къейдерай малум жезвайвал, санлай къачурла, алатай йисуз СКФО-дин регионра энергия ишлемишдай цIийи 19 607 муьштери компаниядин электричестводин кьилин сет­рик кутунва. Санлай къачурла, абуруз 501,2 мегаваттдин (МВт) кьадарда аваз гужлувал ганва.

Къейдзавайвал, 2023-йисав гекъи­гайла, кьилиз акъуднавай икьраррин кьадар 16 процентдин гзаф хьанва.

Гъизвай делилралди, Дагъустанда­ 4,914 икьрарди истемишзавай мажбурнамаяр кьилиз акъуднава, 40,3 МВт-дин кьадарда аваз.

Адет яз, энергокомпанияди яша­йиш­дин метлеб авай объектрал гзаф­ни-гзаф фикир желбзава, абурун арадай яз, чешмеди духтурханайрин, ФАП-рин, целди таъминарай ва яд санай масаниз тухудай карханайрин тIварарни кьазва.

Гьазурайди — Муса Агьмедов