Чи ватанэгьлияр — гьар сана
5-февралдиз Ленинграддин областдин культурадинни искусстводин колледжда РД-дин лайихлу художник Октай Алирзаеван яратмишунриз талукь выставка кьиле фена. Бажарагълу художникди колледжда студентриз живописдай тарсар гуз 25 йис я. Гьавиляй нубатдин выставка «25» лишандик кваз 25 картина раижуналди тешкилна.
Мярекатдал худождикдин алакьунрикай, раижнавай шикилрикай Россиядин культурадин лайихлу къуллугъчи Наталья Вартаняна, Санкт-Петербургда Дагъустандин векилханадин кьил Гьасан Гьасанова, государстводин урус музейдин къуллугъчи Руслан Бахтиярова ва искусстводихъ, яратмишунрихъ галаз алакъалу хейлинбуру чпин фикирар лагьана. Абуру О. Алирзаеван устадвилиз, шикилрин еридиз вини дережадин къимет гана.
Октай Алирзаевич Алирзаев Дагъустандани фадлай машгьур художник я. Ам 1961-йисуз Ахцегьа дидедиз хьана. Сифте хуьруьн юкьван мектебда, гуьгъуьнлай художественный мектебда кIелна. М. Жемалан тIварцIихъ галай художественный училище куьтягьайдалай кьулухъ Ахцегьрин художественный мектебда кIвалахна.
Къазанмишнавай агалкьунриз, гзаф йисарин бегьерлу зегьметдиз килигна, 2019-йисан декабрдиз а чIаван РД-дин Кьил В. Васильеван къарардалди Октай Алирзаевичаз Дагъустан Республикадин лайихлу художник лагьай тIвар гана.
Чи ватанэгьлидин выставкаяр икьван чIавалди хейлин чкайра кьиле фена. Художникрин «Полиреализм» дестедик квай О. Алирзаева гьар йисуз кьиле физвай выставкайра вичин яратмишунарни раижзава. Алатай йисара Китайда, Будапештда, Великобританияда кьиле фейи международный выставкайрани ада Россиядин патай иштиракна.
Чаз ватанэгьлидихъ мадни еке агалкьунар хьана кIанзава.
С. Салимов
