Россиядин яшайишдин фондуни хабар гузвайвал, дидевилин капиталдин куьмекдалди кIвалер къачудайла, цIинин йисалай са дегишвал хьанва: гила, кIвал (кIвалин пай ва я блокировка авунвай эцигунрин пай) маса къачуниз дидевилин капитал ишлемишун патал кIвал вич яшамиш хьун патал виже къведайди ятIа тестикьарзавай къарар (заключение) къалурун герек я. Пулунин такьатар анжах яшамиш жедай мумкинвал авай чка патал серф ийиз жеда.
Къейдзавайвал, цIийи къайдади государстводи гузвай куьмек яшамиш жедай шартIар авачир чка маса къачуниз харжунин вилик пад кьадай мумкинвал гузва.
Маса къачуз кIанзавай кIвалин гьалдиз талукь тир къарар жилинспекциядин, Роспотребнадзордин ва маса идарайрин векилар квай межведомственный комиссияди гуда. Абуру чкадиз къимет гуда, герек тир истемишунар, къайдаяр ахтармишда.
«Лезги газет»
