Са тIимил вахт идалай вилик зун, азарлу хьанваз, Мегьарамдхуьруьн райбольницадин хирургиядин отделенида къаткурна. Чи сагъламвал жегьил духтур Фарман Арифович Агъаханова гуьнгуьна хутазвай.
Ада 2022-йисуз Астрахандин мединститут куьтягьна, кьве йисуз ана кIвалахна. Гила хайи райондиз хтанва, уролог я. Фарман духтур вичин пешедал рикI алай, хъсан чирвал авайди тирди за гьасятда кьатIана. Ада азарлуйриз сагъ хъхьунин, тIал-квал алатунин умудлувал гуда, абурувай хабарар кьада. Гьелбетда, идахъни сагъарунин карда тIимил важиблувал авач. Азарханада вичин сагъламвал мягькемарзавай гъепцегьви Жарулаев Физулиди заз духтурдикай ихьтин келимаяр лагьана: «Зун гзаф азарханайра хьана. Фарман духтур азарлудан тIалдикай хабар кьадай, адаз рикIин сидкьидай килигдай, дерин чирвилер авай жегьил я». Адан гафарал зани къул чIугвазва.
Разивилин чими келимаяр заз хирургиядин отделенидин заведующий Беглеров Эдгаракайни лугьуз кIанзава. Ада 2009-йисуз Дагъустандин госмедакадемиядин «Лечебное дело» факультет куьтягьна. Дербентдин ЦРБ-да хирургиядай интернатурада чирвилер къачуна. 2011-йисалай Мегьарамдхуьруьн райондин поликлиникада хирургвиле кIвалахна. 2017-йисалай ЦРБ-да хирургиядин отделенидин заведующийвилин везифаяр тамамарзава. Чаз акурвал, отделенида низам-къайда ава, духтурри ва амай вири персоналди гьакъисагъвилелди азарлуйриз къуллугъзава. ТIуьнарни хъсандиз гьазурзава. Зун ва ина сагъламвал мягькемарзавай амайбурни рази яз амукьна. Чи сагъламвал гуьнгуьна хтунай духтурриз сагърай лугьуз кIанзава.
Къуй дуьнья — ислягь, азарлуйрин кьадарни тIимил хьурай!
Сулейман Пашаев,
Советский хуьр
