ДТП-яр тIимил жезвач
РД-дин МВД-дин госавтоинспекцияди хабар гузвайвал, 27-январдилай 2-февралдалди Дагъустандин сергьятра улакьрихъ галаз алакъалу 17 авария хьанва. Бедбахтвилин дуьшуьшрикди 5 кас кьена ва 20 касдал жуьреба-жуьре хирер хьана. Хирер хьайибурук са аялни ква.
Рекьера гьерекат авунин къайдайрал амал авунин патахъай датIана тагькимарзаватIани, серенжемрин, жермейрин кьадар артухарзаватIани, рулдихъ ацукьзавайбуруз эсер жезвач. Нетижада инсанар телеф жезва.
Вилик пад кьуна
Дагъустанда полициядин ППС-дин къуллугъчийри къанунсуздаказ прегабалин маса гузвай дуьшуьшдин вилик пад кьуна.
Полицейскийри гужлуз таъсирдай затIар раижунай шак физвай 27 йисан яшда авай агьали кьуна. Абуру рекьяй текдиз физвай жегьилдиз фикир гана. Къайдаяр хуьдай органрин къуллугъчияр акурла, жегьилди вич тIебиисуздаказ тухвана, адак садлагьана къалабулух акатна.
Рахунар ийидайла, жегьил итимди са кьадар вахт идалай вилик вичи къадагъа алай затIар далдаламишдай чка туькIуьрайдакай ихтилатна. Ада къалурай чкадай полицейскийриз прегабалиндин 280 капсула (1117,6 грамм) кутунвай багълама жагъана ва ам вахчуна.
ЧIуру ният авайда гужлуз таъсирдай дарманар малум тушир касдивай маса къачуна. Силисдин управлениди РФ-дин УК-дин 234-статьядин 3-паюнай уголовный дело къарагъарнава. Шак физвайди дустагънава.
«Лезги газет»
