Чепелукь-крокодил

Шикилдай аквазвайди Мексикадин, Юкьван ва Кьиблепатан Америкадин тропикрин тамара яшамиш жезвай суринамдин фонарница я. Винел патан акунриз килигна, адаз чепелукь-крокодилни лугьузва. Гьакъикъатдани, адан кьил крокодилдин кьилиз ухшар я.

Лувар ахъаяйла, абурун гьяркьуьвал 15 сантиметрдив агакьда. Еке чепелукьдин яргъвилел 24 сантиметр кьван жеда. Тамара абуру набататар незва ва миже хъвазва.

Итижлу делилрикай сад ам я хьи, фонарницадин луварал «тапан вилер» ала. Мумкин тир душман пайда хьайила, гьашаратди еке вилерин шикилар алай лувар ахъайзава ва идалди гьужумзавайдаз кичIе ийизва. Гьакъикъатда абур вилер туш, гьабуруз ухшар шикил я.

Вич хуьн патал фонарницади лувара зегьер кIватIзава. Ада незвай гьашарат­рикай бязибур зегьер квайбур я, гьавиляй «яракьдин еринда» ишлемишун патал зегьер лувара тазва. Эгер луварни кваз тIуьн тавуртIа, инсан патал и гьашарат хаталу туш.

«ЛГ»