ЧIехи Гъалибвилин 80 йис тамам хьунихъ галаз алакъалу яз, республикадин ветеранриз 500 агъзур манат ва Ленинграддин гьалкъада хьайибуруз, концлагерриз аватайбуруз 80 агъзур манат гудайвал я. И кардикай РД-дин Кьил Сергей Меликова республикадин «Гъалибвал» комитетдин тешкиллувилин заседанидал лагьана.
«Ватандин ЧIехи дяведа къазанмишай Гъалибвилин 80 йис тамам жезвай йисуз Дагъустандин ветеранрив 500 агъзур манат агакьда. Ленинграддин гьалкъада гьатайбуруз ва концлагерра хьайибуруз 80 агъзур манат гуда», — хабар гузва Дагъустандин Кьилин пресс-къуллугъди.
Мадни къейд авун лазим я хьи, 2025-йисан 1-январдилай Дагъустанда яшайишдин хиляй гузвай бязи пуларни 4,5 процентдин хкажнава. РД-дин зегьметдин ва яшайишдин рекьяй вилик финин министерстводин пресс-къуллугъди хабар гайивал, регионда зегьметдин ветеранриз ва далу патан зегьметчийриз гузвай пуларни хкажнава.
«Лезги газет»
