Хъсан хьуникай ихтилатна
«РИА Новости» чешмеди раижзавайвал, США-дин президент Д.Трампа Россиядинни Украинадин арада къалмакъалдин месэлада хъсанвилихъ камар къачунвайдакай хабар гана.
«Россиядинни Украинадин жигьетдай чун виликди фенва. Килигин, вуч жедатIа. Амма еке кIвалах чна авунва. Чун и манасуз дяве акъвазаруниз мажбур я», — лагьана Трампа журналистриз. Месэла гьялунин жигьетдай авунвай еке кIвалах квекай ибарат ятIа, гьадакай президентди галай-галайвал ихтилатнач.
Сирлу амал
НАТО-дин генеральный секретарь М.Рюттеди хабар гайивал, альянсдиз Украинада авай къалмакъалдин жигьетдай рахунар кьиле тухунин патахъай сирлу амал ава. Адан гафар «Newsweek» чешмеди раижнава.
«НАТО-дин уьлквейриз Россиядинни Украинадин арада ислягьвилин рахунар кьиле тухун патал тайин стратегия ава, амма и амал абуру Россиядин Президент Владимир Путинакай сир яз хуьзва», — лагьана ада.
Къейд ийин, Москвади рахунар кьиле тухуниз гьазур тирдакай са шумудра малумарнай, амма Киевди рахунар кьиле тухунал къанундалди къадагъа эцигнава. В. Зеленскийди 2022-йисуз Россиядин кьиле авайбурухъ галаз рахунар кьиле тухунал къадагъа эцигай къарардал къул чIугуна.
Россиядин къецепатан разведкадин къуллугъдин (СВР) пресс-бюроди идалай вилик хабар гайивал, РагъакIидай пата Украинадин хатасузвал гуьнгуьна хтун патал уьлкведа саки виш агъзур касдикай ибарат, гуя ислягьвал арадал хкидай, контингент тешкилда. СВР-ди и кар Украина гужуналди кьунин гьерекатдив гекъигзава. РФ-дин Президентдин пресс-секретарь Д.Пескова малумарайвал, ислягьвал арадал хкидайбур анжах къалмакъалдин иштиракчийрин кьве терефдин разивал аваз ракъуриз хьун мумкин я. Адан гафаралди, Украинада ислягьвал арадал хкидайбурукай рахун гьелелиг фад я.
Курскдин областда
Курскдин областда женгер 2024-йисан 6-августдилай давам жезва. «Mail.ru» чешмеди 3-февралдиз раижай делилралди, 6-августдилай инихъ Курскдин сергьятра Украинадин кьушунрикай 56 980 агъзур кас тергна.
Россиядин армиядин подразделенийри Курскдин областда суткадин къене ВСУ-дин 210 боевик, пехотадин 2 машин, 2 бронетранспорт, 9 ББМ ва маса яракьар тергна.
Яракьар гзаф къачун теклифзава
Литвадин президент Науседадин фикирдалди, алишверишдин дяведин вилик пад кьун патал Европадин союздин уьлквейри США-дивай яракьар гзаф маса къачун лазим я. Идакай «ТАСС» чешмеди хабар гузва.
Адан гафаралди, Америкадин терефди итиж ийидай вариантар жагъурунал машгъул хьунин чкадал ЕС-ди оборона мягькемарунин кардиз фикир гана. Сиясатчидин фикирдалди, ада теклифзавай месэла Вашингтондизни бегенмиш жеда.
Идалай вилик СМИ-дин чешмейри раижайвал, ЕС-дин уьлквейривай Украина герек тир вири яракьралди тамамдаказ таъминариз жедач, гьавиляй абуру оборонадин промышленностдиз артух фикир гуз башламишна.
10 агъзур аскер ракъурда
Мексикадин президент Клаудия Шейнбаума «Х» соцсетда хабар гайивал, уьлкведи США-дихъ галаз авай сергьят мягькемарун патал 10 агъзур аскер ракъурда.
«Мексикадай США-диз наркотикар, кьилди къачуртIа, фентанил тухунин вилик пад кьун патал Мексикади Милли гвардиядин цIуд агъзур аскердин куьмекдалди кеферпатан сергьят тади гьалда мягькемарда», — кхьенва ада.
Шейнбаумани Трампа кьве уьлкведин сергьятдилай метягьар къанунсуздаказ тухунин месэла веревирдна. Америкадин терефди Мексикадиз къанунсузвилелди яракьар тухунин вилик пад кьун хиве кьуна. Гьа са вахтунда уьлквеяр алишверишдинни хатасузвилин рекьяй алакъалувилелди кIвалахунин меслятдал атана.
Гьазурайди — К. Ферзалиев
