Дагъустанда Сергей Меликован теклиф­далди «Дагъларин гьунар» лишандик­ кваз цIийи проект кардик кутунва. Ана анжах Украинада кьиле физвай махсус­ серенжемдин иштиракчийривай иштира­киз жеда. Проектдин кьилин макьсад серенжемдин иштиракчийрин арадай тешкилатчивилин алакьунар, чирви­лер авай­бур хкягъун ва гележегда абур рес­публикадин ва муниципалитетрин дережадин гьукумдин органра кIвалахдалди таъминарун я.

С. Меликова вичин телеграм-ка­нал­да ха­бар гайивал, проектда иштиракун­ патал заявкаяр кьабулиз эгечIнава. Абур 6-мартдалди кьабулда. И месэладиз талукь­ малуматар телефондин +7(8722) 98 92 92 нумрадай чириз, заявкаяр ла­гьай­тIа, https://доблестьгор.рф сайтдиз рекье тваз жеда.

Программада иштиракзавайбур патал са шумуд шартI ава: Россиядин гражданин, яшамиш жезвай чка Дагъустан хьун, кьилин образование ва СВО-дин иштиракчи тирди тестикьарзавай документ.

«Квекай гьар сада куьн Ватандиз вафалу тирди къалурна. Гила куь вилик цIийи рекьер ва мумкинвилер пайда жезва: авай чирвилерикай, тежрибадикай, алакьунрикай менфят къачуна, квевай Дагъустандин халкьдиз къуллугъ ийиз жеда. Мумкин я, гележегда квекай са ни ятIани тайин райондин­ ва я шегьердин администрацияда, сада — гьукумдин органра, пуд лагьайда яшайишдин са хиле кIвалахун. КIвалахзавай чкадилай аслу тушиз, куьн неинки хъсан пешекарар, гьакIни жувахъ галаз санал халкьни вилик тухуз жедай кар алакьдай тешкилатчияр жедайдак за умудар кутазва», — кхьена Сергей Меликова вичин телеграм-каналда, проектда иштиракдайбурухъ элкъвена.

Чи мухбир