Куьмек гунин ­серенжем

Алукьнавай йисуз Дагъустандин зегьметдин ва яшайишдин рекьяй вилик финин министерстводи «Агьалийриз яшайишдин рекьяй куьмек гун» («Социальная поддержка граждан») гьукуматдин программа уьмуьрдиз кечирмишун давамарда. Идакай, ведомстводин пресс-къуллугъдал асаслу яз, «Дагъустан» РИА-ди хабар гузва.

ИкI, чешмеди къейдзавайвал, 2025- йисуз министерстводи вад-кIуьд лагьай аял хьайила, цIуд лагьай ва адалай гуьгъуьнин аял хьайила, санал кьве аял ва санал пуд ва адалай гзаф аялар хьайила, пулдин выплатаяр гун давамарда.

Са сеферда гудай пулдин такьатар хизанри ихьтин дуьшуьшра къачуда:

— хизанда вад лагьай ва адалай гуьгъуьниз гьар са аял хьайила —  20 агъзур манат;

— санал кьве аял хьайила — 20 000 манат;

— пуд ва адалай гзаф аялар санал хьайила — 100 000 манат;

— хизанда цIуд лагьай ва адалай гуьгъуьниз гьар са аял хьайила — 300 000 манат.

Къейдзавайвал, санлай къачурла, 2024-йисуз выплатаяр 941 хизандиз ганва, абурукай шаз пулдин такьатар къачунва:

— хизанда вад — цIуд лагьай аял хьайила, — 810 хизанди;

— кьве аял санал хьайила, — 118 хизанди;

— пуд аял санал хьайила, — 4 хизанди;

— хизанда цIуд лагьай ва адалай гуьгъуьнин аял хьайила, — 9 хизанди.

Вахчуз жеда

Дагъустандин агьалийривай 2024-  йисуз чпи дарманар къачуниз харж авур харжийрин 13 процент элкъуьр­на вахчуз жеда. Шаз 600-далай виниз агьалийри яшайишдин «налоговый вычет» серенжемдикай менфят къачунва, 15 600 манатдив агакьдалди пул вахчуна (вини кьил — 120 агъзур манат). Идакай «Дагъустан» РИА-ди кхьизва.

Кьилди къачуртIа, агентстводи, Да­гъустандин УФНС-дал асаслу яз, хабар гузвайвал, вычет къачун патал, духтурдин рецептдалди дарманар къачун­вайди тестикьарун лазим я. Къейдзавайвал, и кар рецептдин, медицинадин картадин выпискадин ва я идаз ухшар маса документдин куьмекдалди, гьакIни аптекадай ганвай чекдалди ийиз­ жеда.

Чешмеди раижзавай делилрай гъавурда акьазвайвал, «вычетдин» серенжем неинки арза гузвай касди вичи авунвай харжийриз, гьакIни ам гъуь­луь-папа, диде-бубади, аялри ва 18 йисан яшдилай гъвечIи тир къаюмвилик квайбуру дарманар къачурла авур харжийризни талукь жезва.

Налог элкъуьрна вахчудай кьве жуьре ава:

— жува 3-НДФЛ-дин декларация налогрин инспекциядиз вугуналди;

— кIвалах ганвайдав (работодатель) налогрин уведомление вугуналди.

Къейдзавайвал, и кьве дуьшуьшдани герек вири документар кутуна кIанда.

И серенжемдин гьакъиндай генани гегьеншдиз талукь тир чешмейрай чириз жеда.

Бегьерлувал хкажда

Дагъустанда 2030-йисалди прунздин бегьерлувал ва ам гьасилдай мулкар 1,5-2 сеферда артухарун  пландик кутунва. Идакай РД-дин гьукуматдин те­леграм-каналди хабар гузва.

Чешмеди къейдзавайвал, ихьтин­ макьсад республикади 2024-йисуз и магьсулдин 160 агъзур тонндилай гзаф (яни рекорддин) бегьер кIватI хъувунин кар фикирда кьуналди, РФ-дин хуьруьн майшатдин министерстводи эцигнава.

Раижзавайвал, маса магьсулар хьиз, прунзчивални вилик тухун патал герек тир важиблу шартI мелиорация я.

РД-дин премьер-министр Абдулмуслим Абдулмуслимова къейдзавайвал, гьам федеральный, гьамни рес­публикадин дережада и кар артмишунин месэлайриз хуьруьн майишат вилик тухунин вири этапра кьетIен фикир гузва.

Гьазурайди — Муса  Агьмедов