Гзафбуру фикирзавайвал, Ук­раи­надин миллетбазрихъ галаз ту­­хузвай дяведин махсус серенжемда анжах жегьил итимри иштиракзава. Гьелбетда, абур гзаф я, амма жегьилрихъ галаз Ватандин итижар уьтквемвилелди хуьзвайбурун арада агьиларни ава. Ери-бине Цилингрин хуьряй тир под­полковник Зугьрабов Къази­ Ду­ванбегович хьтин итимарни. Адан 63 йис я, исятда Луганскдин Республикада вилик эцигнавай ва­­жиблу везифаяр тамамарзава.

Малум тирвал, Кьурагь райондин дерейра яшамиш жезвай цилингвияр Дербент райондин, Агълабрик куьч хьанай. Ина 1962-йисуз Къази дидедиз хьана. Хуьруьн школадиз фейи ада кIелунар, кхьинар хушдиз кьабулна. ЧIехи классра авайла, художественный­ ктабар кIелуникни акатна, и кар адан рикI алай машгъулатдиз эл­къвена.

Юкьван школа акьалтIарай гада 1980-йисуз Смоленскдин эцигунрин техникумдик экечIна. Армиядани къуллугъна, техникумни куьтягьна. Диплом къачурла, ам гъавурда гьатна хьи, им ада ахъаяй гъалатI я, руьгьди эдебиятдихъ ялзавай. Са артух фагьум-фикир тахвуна, ада Москвадин Ломоносован тIварунихъ галай университетдиз документар вугана. Вахкана экзаменарни. Адакай филологиядин факультетдин студент хьана. Журналиствилин къуллугъчидин пеше къачур Зугьрабов Къази Дагъустандиз хтана, «Дагъус­тан» гостелерадиокомпанияда кIвала­хал акъвазна. Алакьунар авай жур­­налистдиз республикадин МВД-дин къурулушдиз теклифна. МВД-дин штабдин референтдин везифаяр пуд йисуз тамамарай пешекар МВД-дин информациядин ва жемиятдихъ галаз алакъа­яр хуьдай отделдин старший инспекторвиле тайинарна.

Къенепатан крарин минис­тер­стводин кIвалах итижлуди, кьетIен­ди, жавабдарди ва хаталуди я. Гьукумат, общество, агьалияр министерстводи гьар юкъуз тухузвай кIвалахдикай хабардар авунни важиблу я. Республикада гьар юкъуз­ криминалдихъ, тахсиркарвилерихъ ва маса агьвалатрихъ галаз ала­къалу цIудралди вакъиаяр арадал къвезвайди я. Абурукай виридакай дуьзгуьн малуматар гьазурун, талукь чкайриз агакьарун патал чирвал, алакьун, пешекарвални герек къвезвай. Къази Дуванбеговича 1999-йисалди вичин везифаяр ла­йихлувилелди бегьемарна.

Ахпа кьисметди Зугьрабов­ ЦIийи Уренгойдиз акъудна. Ана ада старший инспекторвиле кIва­­лахна. Пуд йисуз милициядин­ офи­церди Чечен Республикадин­ МВД-дин УВД-дин штабда­ къуллугъна. 2004-йисуз лезги Ямало-Ненецдин округдин Ноя­брь­ск шегьердиз командировкадиз­ ра­къу­рна. Ина ам пуд йисуз­ амукьна. Ше­гьердин УВД-дин чIехибуру Зугь­рабовал жуьреба-жуьре къул­лугъар тапшурмишна. Гьиниз­ ра­къур­натIани, ада вичин везифа­яр гаф текъведайвал кьилиз­ акъудна.­ Идан гьакъиндай УВД-дин начальникдин заместитель, подполковник Н. Голобурдова кхьенвай характеристикадини ша­гьидвалзава. Ана ихьтин гафар ава:

«Милициядин подполковник Къази Дуванбегович Зугьрабова, УВД-дин общественный хатасузвилин милициядин участковыйрин отделдин уполномочен­ныйди­, къенепатан крарин органра 1993-йисан июндилай къуллугъзава. И вахтунда ада вич намуслу, жавабдар, кар алакьдай савадлу пешекар яз къалурна. Къенепатан крарин органрин вилик эцигзавай везифайрин гъавурда хъсандиз ава. Четин уламрай зайифвал тавуна экъечIдай алакьунар ава.

1996-йисалай Къ. Зугьрабов, хаталу ва кьетIен везифаяр кьилиз акъудиз, 11 сеферда Кеферпатан Кавказдин регионриз ракъурна. Анра ада Россиядин Федерациядин битаввал, государстводин хатасузвал таъминарзавай серенжемра викIегьвилелди иштиракна. 2004-2005-йисара, Россиядин МВД-дин патай векил яз, ООН-дин международный миссиядик кваз Косовода кьетIен везифаяр тамамарна. Международный майданда Россиядин МВД-дин къуллугъчи яз, Россиядин милициядин тIвар хкажуник лайихлувилелди вичин пай кутуна.

Виниз тир пешекарвиляй, къул­лугъдин везифаяр чешнелудаказ кьилиз акъудунай, кIвалахда къазанмишай лап хъсан нетижайрай милициядин подполковник Зугьрабов Къази Дуванбеговичан зегьмет са шумуд сеферда Россиядин МВД-дин руководстводи шабагьар гуналди къейдна…»

Къази Дуванбегович «Ватандин вилик лайихлувилерай» II дережадин медалдин ордендин, «Женгинин дуствилин рекьяй», «Общественный къайда-низам хуьна тафаватлу хьунай медалрин, Россиядин МВД-дин Гьуьр­метдин грамотадин «Жуьрэтлувиляй» лишандин ва ведомствойрин шабагьрин сагьиб я.

Украинада дяведин махсус се­ренжемдив гатIунайла, Рагъ­акIи­дай патан 50 уьлкведи, террорист­рин, бандеровчийрин республика­ яракьралди таъминардайла­, пенсияда авай офицердивай кIва­ле­ секиндиз ацукьиз хьанач. 2023-йисуз ада, руьгьдин эмирдиз муьтIуьгъ хьуналди, РФ-дин оборонадин министерстводихъ галаз икьрар кутIунна. Исятда нацист­рал гъалибвал къачунин женгера иштиракзава. Баркалла ихьтин лезги къагьримандиз. Ам жегьилриз лап хъсан чешне я.

Нариман Ибрагьимов