Сергей Меликова РФ-дин Силисдин комитетдин председатель Александр Бастрыкинавайни къенепатан крарин министр Владимир Колокольцевавай Подмосковьеда авай полициядин отделда азабар, азиятар гана лагьана арза кхьенвай дагъустанви Мегьамед Мегьамедован кIвалах кьетIен гуьзчивилик кутун тIалабнава.
«Ихьтин месэлайрин гьакъиндай Владимир Александровичахъни Александр Ивановичахъ садалайни аслу тушир чпин гаф, фикир авайди заз хъсандиз малум я. Абур Кавказдив, кьилди къачуртIа, дагъустанвийрив, гьуьрметдивди эгечIзава. Гьавиляй за абурувай и кIвалах чпин гуьзчивилик кутун тIалабзава», — кхьена Сергей Меликова вичин телеграм-каналда.
Дагъустандин Кьили гьакIни къейд авурвал, ада М. Мегьамедован адвокатди раижнавай делилриз тамамдиз ва гьахълудаказ къимет гудайдак ва тахсиркарар жавабдарвилиз чIугвадайдак умуд кутунва.
Са шумуд югъ идалай вилик интернетдин майданриз Москвадин областда къанун-къайда хуьдай органрин векилри кьунвай дагъустанви М. Мегьамедова вич полициядин отделда гатанвайдакай хабар гузвай видеоролик акъатна. РФ-дин МВД-дин малуматралди, дагъустанви къанунсуздаказ яракьар гьазурунай шак финай кьунвай. Талукь идарайрин къуллугъчийри М. Мегьамедов терроризмдихъ галаз алакъада авани, авачни тайинарда. Адан арзадилай кьулухъ силисчийри ахтармишунар кьиле тухузва.
Чи мухбир
