Дяведин махсус серенжемда иштиракзавайбурун алакьунрикай, тежрибадикай менфят къачун, хирер хьана, набутриз элкъвенвайбуруз куьмек гун, абур обществодивай къерех тахьун патал уьлкведа Президент Владимир Пути­нан теклифдалди федеральный «Игитрин девир» программа кардик кутунва. Гьадаз ухшар «Дагъларин кьегьалвал» программа Дагъустанда  2024-йисан гатфариз гъиле кьунай. Гила ам «Игитрин девир» программадин региондин серенжемдиз элкъведа. РД-дин Кьил Сергей Меликова махсус программадин гьакъиндай указдал къул чIугунва.

— За са шумудра лагьайди я,- къейдна региондин Кьили, — фронтдин цIаярай экъечIайбуруз гьахълувилин, намуслувилин ва лайихлувилин­ къимет амайбурулай хъсандиз чида. Ахьтин­ инсанар важиблу месэлаяр гьялунивни жа­ваб­дар­вилелди эгечIда ва абуру инсанар ал­дат­миш­дач, абурук умуд кутаз жеда.

Алай вахт ахьтинди я хьи, сифте чкадал ах­лакьдин, марифатдин ерияр — ватанпересвал­,  чандилайни гъил къачуна, Ватандиз къуллугъ авун эцигзава. Дяведин махсус серенжемда иштиракзавайбур гьа ихьтин ерийралди тафаватлу жезва. Гьа са вахтунда кIвалах хъсандиз кьилиз акъудун патал алакьунарни, тежрибани, чирвилерни герек къвезва. «Дагъустандин кьегьалвал» программадин сергьятра аваз, махсус серенжемдин иштиракчийриз ва ветеранриз алава чирвилер къачудай, тежриба кIватIдай ва кIвалах идара ийидай мумкинвилер яратмишда.

С. Меликова вичин телеграм-каналда къейд авурвал, махсус серенжемдин иштиракчийрик, ветеранрик бажарагълу, кар алакьдай гзаф инсанар ква. Абурулай республикадин ведомствойра­ кIвалахиз, кар вилик тухуз алакьда. Гьукумдин ор­г­анра кIвалахун гьакI къуллугъ кьун туш. Къуллугъдал алай касди вичин алахъунралди, намус­лувилелди везифаяр кьилиз акъудуналди, рес­публика вилик финик пай кутуналди агъзурралди­ дагъустанвийрин уьмуьрдиз, гьал-агьвал хъса­на­руниз таъсирзава. Республикади, регионрикай сифтебурукай сада яз, дяведин махсус серенжемдин иштиракчийриз государстводин къул­лугъ­дал чпин алакьунар къалурдай мумкинвал гана. Вахтуни ва крари къалурзавайвал, государстводин къуллугърал желбнавай СВО-дин ветеранри чпин везифаяр агалкьунралди тамамарзава.

Региондин Кьили мадни лагьайвал, тешкиллувилин кIвалах акьалтIарнава. «Дагъларин кьегьалвал» программадик экечIиз кIанзавай­буру арзаяр кхьидай вахт алукьнава. Абурун документриз комиссия килигда, программада иштиракиз хкягъайбур резервдик кутада ва абурухъ галаз идара ийидай рекьяй тежриба авай насигьатчийри кIвалахда. Алакьунар авай лап хъсанбуруз республикада кIвалах гуда. Ашкъи авайбур федеральный «Игитрин девир» программадин финалдин паюник  кутун патал теклифда.

«Дагъларин кьегьалвал» программадин мярекатар гьазурунин ва уьмуьрдиз кечирмишунин рекьяй жавабдарвал РД-дин Кьилин ва Гьукуматдин Администрациядин хиве ава. Гьукумдин маса органривайни, муниципалитетривайни и хъсан кардик чпин къуьн кутаз жеда.

Малумарнавайвал, «Дагъларин кьегьалвал» программада дяведин махсус серенжемдин вири иштиракчийривай ва ветеранривай иштиракиз жеда. Им жуван халкьдиз къуллугъдай, хайи маканар ва республика санлай вилик тухуник хсуси зегьметдин пай кутадай вахт я.

Абад  Азадов