Дюгонь
Шикилдай аквазвай гьайвандиз дюгонь лугьузва. Индиядин ва Тихий океанра яшамиш жезвай и гьайван нек хъвадайбурук акатзава. Чпин кьадар тIимил хьанвайвиляй дюгонар тIебиат хуьнин рекьяй международный союздин яру сиягьдик кутунва.
Дюгондин бедендин яргъивилел вини кьил 4 метр жеда, заланвал 600 килограммдив агакьнавай дуьшуьшар малум я. Кьериз чIар алай векъи хам 2-2,5 сантиметрдин яцIу я. Яшар гзаф жердавай и гьайвандин ранг мичIи жеда.
Цин жуьреба-жуьре набататар нез, дюгонар асул гьисабдай 10-20 метрдин деринра яшамиш жезвай гьайванар я. Бязи дуьшуьшра абуру куьлуь пахлаханарни неда. Са йикъан вахтунда и гьайванди 40 килограмм набататар незва. Адет яз, дюгондивай са сятда 10 километрдиз сирнав ийиз жезва, амма къурху акатай бязи дуьшуьшра гьатта са сятда 18 километрдин мензилдиз сирнавзава.
Пешекарри къейдзавайвал, дюгонар тахминан 70 йисуз кьван яшамиш жезва. Це и гьайванрин душманрик нахаяр ва крокодилар акатзава.
«Лезги газет»
