Тапан карчи
Махачкъалада яшамиш жезвай дишегьлидал са жерге лутувилерай шак физва. Санлай къачурла, ада лутувилелди масабурун 3 миллионни 830 агъзур манатдин къимет авай эменни вичиз жедай кьуьруькар акъуднава лугьузва.
Махачкъаладин полициядин къуллугъчийри тайинарайвал, 2023-йисан августдиз 36 йисан яшда авай дишегьлиди шегьерэгьли маса дишегьлидивай, маса гуда лагьана, миллионни зур манатдин къимет авай къизилдин шейэр ва парталар къачуна. Нетижада абур маса ганач, вичиз туна.
Месэладай кьил акъудун патал шак физвайди полицейскийри отделдиз хкана. Вичин тахсир дишегьлиди хиве кьуна ва ада «бизнес гьа ихьтинди жедайди я» лагьана.
Ада маса лутувални авунва. Вичин танишривай пул къачуна, чIуру ният авай дишегьлиди абуруз государстводин патай яшайишдин пулунин такьатар къачудай рекьер ачухун хиве кьуна. Хиве кьур крар кьилиз акъуддай гьич са мумкинвални авачиз, шак физвайда танишривай 2 миллионни 330 агъзур манат пул къачуна.
Машин чуьнуьхна
Махачкъала шегьердин полициядин къуллугъчийрив и йикъара чкадин агьалидилай машин чуьнуьхунихъ галаз алакъалу арза агакьна. Махачкъалавидин гафаралди, кIвалин патав акъвазарнавай «ВАЗ-2114» машин малум тушир касди чуьнуьхна.
Полицейскийри шак физвай кьве агьали кьуна ва отделдиз хкана. Абур 28 ва 29 йисарин яшара авай жегьилар я. Чпи авур чIуру кар абуру хиве кьуна. Машин иесидив вахкана.
И кардиз талукь яз РФ-дин УК-дин 166-статьядин 2-паюнай (автомобиль ва я маса улакь законсуздаказ жуваз кьун) уголовный дело къарагъарнава.
«Лезги газет»
