19-январдиз Дербентдин Олимпиада­дин резервдин спортдин школада (СШОР) азаддаказ кьуршахар кьунай, РагъэкъечIдай патан Кавказдин­ халкьарин милли азадвал патал гье­рекатдин башчи Гьажи Давуд Муьш­куьрвидин экуь къаматдиз бахш­на, ачух турнир кьиле тухвана. Адан тешкилатчияр — Гьажи Давудан тIварунихъ галай диндинни просвещенидин цент­радин директор Нариман Фаталиев ва акъажунар кьиле фейи «Дербент» СШОР-дин тренер-муаллим Гьамза Гьажимурадов, генеральный спонсор — ракIаррин «Гранд» туьквен, кьилин судья Руслан Шихшунатов тир.

Макьсад республикада спорт машгьур авун, гьакIни жуьреба-жуьре шегьерринни Кьиблепатан Дагъустандин районрин  спортсменрин арада дуствал мягькемарун, абур ватанпересвилин руьгьдаллаз тербияламишун ва республикадин дережадин акъажунра иштиракдай викIегь спортсменар хкягъун тир спортдин и серенжем азаддаказ кьуршахар кьунин жигьетдай кардик квай международный къайдайрал амална кьиле тухвана. Акъажунра 12 командадик кваз 260 спортсменди гьасиррал чпин устадвал ва алакьунар къалурна. Абурун арада Дербент, Да­гъустандин Огни шегьеррай, Ахцегь, Дербент, Докъузпара, Мегьарамдхуьруьн, Кьурагь, СтIал Сулейманан, Рутул, Табасаран, Хив районрай тир спортсменар авай.

Къизгъин бягьсерин нетижада жаванри азаддаказ кьуршахар кьунал чпин рикI алайди  субутунихъ галаз сад хьиз, чпихъ спортдин и жуьредай устадвал авайдини къалурна. Жаванри техникадин рекьяй хъсан гьазурлухвал, гъалибвал къазанмишун патал чпихъ еке къаст — руьгьдинни бедендин лигимвал авайди субутна. ИкI, Дербентдин команда — 1, Белиж поселокдин команда — 2 ва Ахцегь райондин команда 3-чкайриз  ла­йихлу хьана.

КIвенкIвечи чкаяр кьур спортсменриз дипломар ва медалар гана.

Рагнеда  Рамалданова