СтIал Сулейманан райондин Цмуррин хуьруьн мектебда, алим, жемиятдин крарал активнидаказ машгъул хьайи кас тир Мариф Къадимов рикIел хуьниз талукьарна, 9-классра кIелзавай аялрин арада информатикадай районрин уртах олимпиада кьиле фена. Гьар йисуз кьиле тухузвай и мярекат мергьяматлувилин «Леки» ва «Хуьр» фондарин ва райондин администрациядин куьмекдалди тешкилна, хабар гузва муниципалитетдин информациядин къуллугъди.
Олимпиададин иштиракчияр ва мугьманар райадминистрациядин образованидин управленидин начальник Гьуьсейн Шихбабаева ва Цмуррин СОШ-дин директор Евгений Кузьминскийди къаршиламишна. Гьуьсейн Шихбабаева муниципалитетда образованидин ери хкажунин, бажарагълу аялриз куьмек гунин, абуруз гележегда гегьенш мумкинвилер ачухунин жигьетдай кьиле тухузвай кIвалахдикай лагьана, ихьтин мярекатар тухунин рекье куьмекар гузвай мергьяматлувилин фондариз чухсагъул малумарна ва акъажунарзавай аялриз бахтуни гъун, агалкьунар хьун алхишна.
Олимпиадада республикадин Кьиблепатан округдик акатзавай 5 райондай тир аялри иштиракна. Акьулдиз, кьатIунин бажарагъдиз талукь и акъажунра сад лагьай чка (пулдин приз — 10 000 манат) Мегьарамдхуьруьн райондин КьепIир-Къазмайрин юкьван мектебда кIелзавай Алия Шагьпазовади кьуна. Мегьарамдхуьруьн райондин образованидин управленидин начальник Улубег Абейдуллаева хабар гайивал, муниципалитетдай тир мад са аял — Филерин СОШ-дин ученик Мирлан Насиров пишкешриз лайихлу хьайи вад касдин арада (5-чка) ава.
Олимпиададин нетижайралди, кьвед лагьай чка (8000 манат) — СтIал Сулейманан райондин Курхуьрин мектебда кIелзавай Азим Сердерова, 3-чка (6 000 манат) — ЦIийи поселокдин СОШ-да кIелзавай Зульфия Жабраиловади, 4-чка Кьурагь райондин КIирийрин мектебдин ученик Эльмар Казирова кьуна.
Шабагьриз лайихлу хьайи аялрин муаллимрин зегьметни пишкешралди къейдна.
Амина Муслимова
