ЦIийи йисан вилик, республикадин саки вири министерствойра ва ведомствойра хьиз, Росгвардиядин Дагъустанда авай Управленидани территориальный органдин подразделенийрин кIвалахдин алатзавай йисан нетижаяр кьуниз талукьарнавай гегьенш совещание кьиле фена. Росгвардиядин Дагъустанда авай Управленидин начальник, генерал-майор Александр Орехован регьбервилик кваз кьиле фейи и мярекат башламишдалди вилик кIватI хьанвайбуру, къуллугъдин везифаяр кьилиз акъуддайла, телеф хьанвай омоновчийриз Росгвардиядин Дагъустан Республикада авай Управленидин ОМОН-дин «Горец» базада хкажнавай мемориалдал цуьквер эцигна, са декьикьада кисна акъвазуналди, абурун экуь къаматар рикIел хкана.
Совещанидал Росгвардиядин Дагъустанда авай Управленидин начальникдин заместитель — штабдин начальникдин везифаяр вахтуналди тамамарзавай Максим Жалыбина доклад авуна, 2024-йисуз кьилиз акъуднавай кIвалахдин нетижаяр кьуна. Ада къейд авурвал, алатзавай йисуз Управленидин къуллугъчийри 3 агъзурдалай виниз, гьа гьисабдай яз республикада кьиле тухвай чIехи мярекатра общественный къайдаяр хуьниз ва хатасузвал таъминаруниз талукь 2 агъзурдалай виниз серенжемар кьилиз акъудна, гьакIни, терроризмдихъ галаз женг чIугунин сергьятра аваз, ФСБ-дин ва республикадин МВД-дин подразделенийрихъ галаз 1000-далай виниз, ФСБ-дин региондин управленидин ва МВД-дин линейный управленидин куьмекдалди — транспортда, Росрыболовстводин Кеферпатан Кавказдин теруправленидин къуватрин ва такьатрин гьисабдай яз, Каспий гьуьле, Терек ва Сулак вацIара законсузвилелди цин ресурсрикай менфят къачузвайбурухъ галаз женг чIугунихъ, къанун-къайда хуьнихъ элкъуьрнавай серенжемар кьиле тухвана.
Заседанидал кьилди гьар са подразделениди террориствилин тахсиркарвилерин вилик пад кьунихъ, общественный къайдаяр хуьнихъ элкъуьрна кьилиз акъуднавай кIвалахдални акъвазна.
Россиядин ФСБ-дин Дагъустан Республикада авай Управленидин регьбер, генерал-майор Геннадий Анацкийди ва республикадин къенепатан крарин министр, полициядин генерал-лейтенант Абдурашид Мегьамедова республикада хатасузвал таъминаруник лайихлу пай кутунай Росгвардиядин теруправленидин къуллугъчийриз сагърай лагьана.
Санлай йисан нетижаяр кьун яз, Александр Орехова 2024-йис патал вилик эцигнавай везифаяр тамамвилелди кьилиз акъудиз алакьайди къейдна, алукьзавай ЦIийи йис тебрикна, виридахъ чандин мягькем сагъвал, хизанра хушбахтлувал хьун алхишна.
— Уьлкведин Президентди, Росгвардиядин федеральный къуллугъди алукьзавай йисуз вилик эцигнавай месэлаярни чна саналди вини дережада аваз кьилиз акъудунихъ зун кIевелай инанмиш я. 2025-йисуз, виликан йисара хьиз, терроризмдихъ ва экстремизмдихъ галаз женг чIугун, общественный къайдаяр, гьукуматдин важиблу объектар хуьн, Управленидин къуллугъчийри Украинада кьиле физвай дяведин махсус серенжемда иштиракун важиблу месэлайрик акатзава, — къейдна ада.
Эхирдай чпин везифаяр намуслудаказ кьилиз акъудзавай къуллугъчийрив государстводин ва ведомстводин шабагьар, чухсагъулдин чарар ва къиметлу пишкешар вахкана.
Рагнеда Рамалданова
