Дагъустандин, гьакIни Россиядин жуьреба-жуьре вузра чирвилер къачузвай, чпихъ агалкьунар авайди тестикьарзавай жегьил гадайрикайни рушарикай хабарар агакьайла, чун пара шад жезва. Школада, вузда кIелунра агалкьунар къазанмишуни гележегда хъсан пешекар хьунин умудлувал гузва эхир. Гьа ихьтинбурукай сад Дагъустандин госмедуниверситетдин (ДГМУ) 6-курсунин студентка Гуьлметова Айиша Зумрудиновна я.
Ам Ахцегьа дидедиз хьана. Сифтедай умуми чирвилерин (ООШ), эхиримжи кьве йисуз Ахцегьрин 2-нумрадин юкьван школайра кIелай ада 2018-йисуз мектеб къизилдин медаль къачуналди акьалтIарна. Гьеле аял вахтарилай рикIе духтур хьунин къаст авай руш гьа йисуз медицинадин университетдик экечIна. Сифте курсунилай эгечIна, ада хъсан къиметар аваз кIелзава, вуздин общественный уьмуьрдани активнидаказ иштиракзава. Ам волонтёр, волейболдай СКФО-дин чемпионка я. ДГМУ-дин лап хъсан студентрин арада аваз, ада ина, гьакIни вузрин арада тухузвай олимпиадайра ва конкурсра иштиракзава, са шумудра кIвенкIвечи чкаяр кьуна. И карни Айишадиз ганвай грамотайрини дипломри тестикьарзава. Тежриба къачун патал чи ватанэгьли республикадилай къеце кьиле физвай серенжемрани иштиракиз алахъзава. ИкI, са тIимил вахт идалай вилик ада, ДГМУ-дин делегациядик кваз, Москвада кьиле фейи международный «Милли здравоохранение — 2024» 3-конгрессда иштиракна. РФ-дин Президент В. Путинан регьбервилик кваз тешкилзавай и серенжем медицинадин хилен кар алай месэлаяр веревирдзавай майдан я лагьайтIа, жеда. А. Гуьлметовадиз, гьакI делегациядин амай членризни, къенин юкъуз здравоохраненидин хиле авай цIийивилерихъ галаз таниш жедай ва Президентдихъ яб акалдай мумкинвал хьана. Шаксуз, гележегда ихьтин тежриба жегьил пешекардиз бакара къведа, цIийивилерикай ада вичин кIвалахда менфят къачуда.
Айишадиз, гьакI чпин кIелунралди чи руьгь хкажзавай амай жегьилризни алукьзавай ЦIийи йис тебрик авунихъ галаз сад хьиз, чна гележегда абурухъ мадни чIехи агалкьунар хьун алхишзава.
Рагнеда Рамалданова
