И йикъара Запорожьедин областдин Мелитополь шегьерда Росгвардиядин спецназдин офицер, Жуьрэтлувилин кьве ордендин сагьиб, дяведин махсус серенжемда игитвилелди телеф хьайи, вичин ери-бине Мегьарамдхуьруьн райондай тир Руслан Примован экуь къаматдиз бахшна, школада кIелзавай аялрин арада киокусинкайдай 1-турнир кьиле тухвана.
Ам Р. Примовахъ галаз санал къуллугъ кьиле тухвай юлдашри, Запорожьедин областдин СК-дин, «Защитники Отечества» Госфондунин филиалдин регьбер М. Смирнова тереф хуьналди ва куьмекар гуналди тешкилнавай. Гележегда и турнир шегьердин, областдин ачух кIвенкIвечивал патал тухун пландик ква.
Турнир Руслан Примоваз «Игитдин парта» ачухнавай 15-нумрадин школада кьиле фена (адан патав гвай «Игитрин аллеяда» чи ватанэгьлидин портрет алай щит эцигнава). Спортдин серенжем ачухуниз талукьарнавай мярекатда чи ватанэгьлиди къутармишай Морковкинрин хизандини иштиракна. Анал рахайбуру кьегьалдин игитвал рикIел хкунихъ галаз сад хьиз, Р. Примов Запорожьедин вири областдин игит тирди, ам гьамиша абурун рикIера амукьдайди къейдна.
Рагнеда Рамалданова
