15-декабрдиз Мегьарамдхуьре, СССР-дин Игит Абас Исрафилован тIварунихъ галай 1-нумрадин ДЮСШ-да, 2008-2009- йисара дидедиз хьайи жаванрин арада азаддаказ кьуршахар кьунай Кьиблепатан Дагъустандин кIвенкIвечивал патал зонадин акъажунар кьиле фена.
Макьсад спортдин и жуьре вилик тухун, адал машгъул жезвай жаванрин кьадар артухарун, акьалтзавай несилрин арада дуствилин алакъаяр мягькемарун, жаванар сагълам уьмуьр кьиле тухунал желб авун хьиз, кьилинди, Дагъустандин кIвенкIвечивал патал акъажунра иштиракдай викIегь спортсменар хкягъун тир и акъажунра Кьиблепатан Дагъустандин саки вири районрин викIегь спортсменри гьасиррал чпин устадвал къалурна. Гила абурун вилик Махачкъалада кьиле фидай республикадин дережадин акъажунра чпин гьунарар къалурун ква.
Кьилди къачуртIа, Докъузпара райондин хкянавай командадик кваз и акъажунра иштиракай Даштемир Даштемиров 80 кг-дин заланвал авайбурун арада 1-чкадиз лайихлу хьана. Мадни кьве жаванди — Амирхан Шихова (48 кг) ва Зайидин Адилова (92 кг) 2-чкаяр кьуна.
Акъажунра 1-чка кьурбурун арада Кьурагьрин ДЮСШ-да тренер Эрелар Фейзуллаеван гъилик устадвал хкажзавай Гьажимурад Эмирбеговни ава. Им жавандин сифтегьан агалкьун туш. Жуьреба-жуьре турнирра ада идалай виликни са шумудра кIвенкIвечи чкаяр кьуна.
Рагнеда Рамалданова
