ЦIийи ктабар
Сейфудин Шагьпазов. Кьурагь райондин Гелхенрин хуьряй тир и шаирдин тIвар кIелзавайбуруз фадлай таниш я. Махачкъалада, «Мавел» издательствода, С. Шагьпазован «Иви яд туш» ктаб чапдай акъатна.
И йикъара Сейфудин Шагьпазов СтIал Сулейманан райондин «Куьредин хабарар» газетдин редакциядиз мугьман хьана. Ада редакциядин библиотекадиз вичин цIийи ктаб багъишна.
«Сейфудинан микьнатIис» кьил ганвай сифте гафуна Дагъустандин писателрин союздин секретарь Максим Алимова кхьенва: «…Адан шиирра адетдин уьмуьрдин философияди хейлин чка кьунва. Абур кIелай гьар сада вичин фагьум-фикирдикни юзун кутазва, шаирдихъ галаз уьмуьрдин къекъуьнрай кьил акъудиз гатIунзава: вуч я Ватан, вуч я хайи чил, чIал, муьгьуьббат, хаинвал… Шаирди месэлаяр къарагъарзава, къалурзава, чIуру хесетрихъ, адетрихъ галаз женг тухуниз эверзава».
“Иви яд туш” ктабда 100-далай виниз шиирар (сонетар, гъезелар, басняяр, рубаияр, манияр, зарафатдин эсерар, айгьамар, триптихар, бахш-бендер) гьатнава.
Чна къелемдин стха Сейфудин Шагьпазоваз цIийи ктаб акъатун мубаракзава, адахъ яратмишунрин рекье мадни еке агалкьунар хьун чи мурад я.
Хазран Кьасумов
