Алай йисуз гуьгьуьллу дагъустанвийрикай тешкилнавай «Каспий» батальондин­ аскерри дяведин махсус серенжемда ви­кIегь­диз ва жуьрэтлудаказ иштиракзавайдакай, чпин вилик эцигзавай вири тапшуругъар уьтквемвилелди тамамарзавайдакай жуьреба-жуьре изданийри кхьизва, командирри кьегьалрин игитвилер государстводин шабагьралди къейдзава.

Россиядин Конституциядин юкъуз Да­гъустан Республикадин Кьил Сергей Меликовани Ватандин итижар, аслу туширвал хуьн патал кьиле тухузвай дяведин махсус серенжемда телеф хьайи кьегьалрин, ­Дербентдин чувудрин ибадатхана хуьзвай къаравулрин багърийрив государстводин шабагьар вахкана.

Ясдин партал алайбуруз башсагълугъвал гайидалай гуьгъуьниз региондин Кьили лагьана: «Куь рухвайри, уьмуьрдин юлдашри, бубайри, стхайри чи государстводин аслу туширвал, мулкар, агьалийрин хатасузвал хуьн патал еке жуьрэтлувал, Ватандиз авай кIанивал, игитвал къалурна. Абур чпи вуч ийизватIа, хъсандиз гъавурда авай. Ватан, чи секинвал, къул-кIвал хуьн патал чпин чанар къурбанд авур ахьтин рухваяр, кьегьалар чна гьамиша рикIел хуьда».

Лайихлувилер къейд авур ва чIехи шабагьар гайибурун арада старший лейтенант Шамил Мегьамедовни авай. Адаз (телеф хьайидалай кьулухъ) «Дагъустан Республикадин вилик лайихлувилерай» орден ганвай.

Шамил Мегьамедов дяведин махсус серенжемдив эгечIай йикъалай Донбассдин чилел алай. Адахъ галаз къуллугъ авур аскерри рикIел хкизвайвал, мус ва гьихьтин тапшуругъ агакьайтIани, Шамил сифте вич вилик фидай, гьар са чка, улам ахтармишдай, хаталувал авачиз акурла, ахпа взводдиз буйругъ гудай. Украинадин миллетбазрихъ галаз кьиле фейи нубатдин женг адаз эхиримжиди хьанай. Гьа вахтундани ам, взвод кьулухъ туна, вилик пад ахтармишиз фенай. Гьайиф хьи, ам душмандал расалмиш хьана. Телеф хьанатIани, ада вичин аскерар саламатдиз хвена.

«Каспий» батальондин аскерар тир Вугар Азаеван, Батирхан Къубиеван, Мегьамед Каркаеван, Халил Мегьамедован ва Ай­нудин Магьсудован викIегьвилер «Жуьрэтлувал къалурунай» медалралди къейдна.

Са десте аскеррин кьиле авай Вугар Азаева маса чкадал сенгер кьуна кIанзавай. Душманди минометрай, акъваз тийиз, гуьл­ле гузвай. Азаева, кичIе тахьана, уьтквемвал къалурна, вичин десте саламатдиз тайин­ чкадал тухвана. Амма вичел залан хер хьана, духтурривай ам къутармишиз хьанач.

Батирхан Къубиева, душмандиз таквадай чкадиз фена, миллетбазрин сенгерар алай чкайрикай чи артиллеристриз хабар гузвай. Абуру душмандин са шумуд сенгер тергна. Къубиевахъни душмандин гуьлле галукьна.

Мегьамед Каркаева гьужумдиз физвай чи частарив вичин автомашинда аваз яракьар, гуьллеяр агакьарзавай. Нубатдин тапшуругъ тамамардайла, аскердихъ гуьлле галукьна ва ам телеф хьана.

Разведчикар тир Халил Мегьамедова ва Айнудин Магьсудова чи командиррин пун­ктунив душмандикай герек делилар агакьарзавай. Укронацистрин дронрин хурук акатай абурал гзаф кьадар хирер хьана.

«Жуьрэтлувал къалурунай» медалар, Дербентдин синагога хуьдайла, викIегьвал къалурай, чпин чанарни гьайиф татана, тер­рористрин вилик пад кьур къаравулар тир Ражидин Мегьамедован ва Рейзудин Исмаилован багърийривни вахкана.

Шабагьралди къейд авурбурун мукьва-кьилийри четин вахтунда чпин гьакъиндай къайгъударвал авунай Сергей Меликоваз сагърай лагьана.

Нариман  Ибрагьимов