Мукьвара «Ахцегь район» МР-дин кьил Абдул-Керим Палчаева Дагъустан Республикадин Кьил С.А. Меликовалай фияиви аскер Магьир Рамазанован диде-бубадин тIварцIел хтанвай Разивилин чар буба Межлум Бедрединовичав вахкана.
Старший прапорщик Магьир Межлумовича 2021-йисалай РФ-дин Яракьлу Къуватра намуслувилелди къуллугъзава. Сифте йикъарилай ада Донбассдин чилер азад хъувун патал гъиле яракь аваз укронацистрихъ галаз игитвилелди женг чIугвазва. Командованиди адаз женгинин са шумуд шабагь ганва.
«Гьуьрметлу Межлум Бедрединович ва Вагьибе Умметовна. Душмандихъ галаз дяведин махсус серенжемда Ватан хуьнин пак буржи жегьил чанни къурбанд ийиз гьазурвилелди тамамарзавай лайихлу хва тербияламишунай куьн пара кьадар сагърай! Женгинин тапшуругъар тамамарунин карда Магьир Межлумович кьетIен дирибашвилелди, жуьрэтлувилелди тафаватлу я. ВикIегь аскер, вичихъ мус хьайитIани ихибариз жедай ватанперес хва тербияламишунай чухсагъул! Къуй квез чандин сагъвал, ислягьвал, дуланажагъдин къулайвал хьурай!», — кхьенва Сергей Меликован чарче.
Ахцегь райондин кьилини, вичин ва райсобранидин депутатрин патай Ватан хуьзвай викIегь аскердин диде-буба тебрикуналди, Межлум Рамазановаз къиметлу пишкеш гана.
Дашдемир Шерифалиев
