Курскдин областда ВСУ-дин есирда гьатай аскер, фияви Айнудин Алиев сагъ-саламатдиз кIвализ хтана. И карда адаз федеральный гьукумдарри куьмекна. Райондин сергьятдал аскер мукьва-кьилийри, хуьруьнвийри, райадминистрациядин къуллугъчийри ва жемиятдин векилри гьуьрметдивди къаршиламишна. Авай са хва дяведин цIун юкьвай сагъ-саламатдиз хтунал шадвалзавай багърийривай рикIин гьиссер хуьз жезвачир. Аскер къаршиламишунин гуьруьш Фиярин хуьруьн патай райсобранидин депутат Леонард Атлуева тешкилна.
Райадминистрацияда Айнудин Алиев ва адахъ галайбур «Ахцегь район» муниципалитетдин кьил Абдул-Керим Палчаева хушдиз кьабулна, абурухъ галаз ачух рикIин суьгьбетарна.
— 6-августдиз нацистри Курскдин областдал вегьейла, чун сергьятдал алай. Командованидин эмирдалди чун душмандин хура акъвазна. Амма къуватар барабарбур тушир. Куьмек вахтунда агакьнач. Авайвал лугьун, телефвилерни, хирер хьайибурни хьана. Чун есирвиле гьатна… — ашкъи авачиз ихтилатзава А.Алиева.
Душмандин есирвиле кьилел атай вири четинвилеризни азиятриз килиг тавуна, Айнудин Алиев кIубан я, руьгьдай аватнавач. Укронацистрихъ галаз дяве гъалибвилелди куьтягь жедайдахъ ам кIевелай инанмиш я. Хайи хуьре са кьадар ял яна, къуватар кIватI хъувуна, адаз СВО-диз фидай икьрар кутIундай фикир ава.
Абдул-Керим Палчаева Айнудиназ руьгьдин мягькемвиляй чухсагъул малумарна.
Вичин нубатда Айнудин Алиева, «Фиярин хуьр» СП-дин кьил Мансур Мамедалиева ва райсобранидин депутат Леонард Атлуева СВО-дин иштиракчийринни абурун хизанрин къайгъударвал авунай Ахцегь райондин кьилер авайбуруз чухсагъул лагьана.
Пехъи душмандин гъиляй ахкъатна хтай аскердихъ, СВО-дин викIегь иштиракчидихъ, фияви Алидинахъ авай са хцихъ галаз фадлай вил алай гуьруьшрин еке шадвилер дагълух хуьре яргъалди давам хьана. Къуй дяве чи гъалибвиелди куьтягь хьана, жегьилар сагъ-саламатдиз ва хуруйрал женгинин орденарни медалар алаз чпин хизанриз хтурай!
Дашдемир Шерифалиев
