Дагъустандин Гьукуматди «Душа Дагестана» премиядин 2024-йисан сагьибар тайинарнава. И премия Дагъларин уьлкведин халкьдин яратмишунар ва адетдин меденият хуьнин ва вилик тухунин кардик лайихлу пай кутунвайбуруз гузва.
ЦIи жуьреба-жуьре номинацийрай («Халкьдин кьуьл», «Халкьдин мани», «Халкьдин макьам», «Халкьдин театр», «Жегьил бажарагъар» ва мсб.) «Душа Дагестана» премиядиз 15 кас лайихлу хьанва.
Шад жедай кар ам я хьи, премиядин сагьибрин арада чи ватанэгьлиярни ава: Ахцегь райондин администрациядин медениятдин управленидин артистка, манидар Таира Муспагьова, фольклордин «Анжи» ансамблдин регьбер Симсар Мегьамедов, Кьурагь райондин халкьдин театрдин режиссёр Шафудин Саруев.
«Лезги газетдин» редакциядин коллективди виридаз республикадин дережадин премия мубаракзава ва абурухъ мадни еке агалкьунар хьун алхишзава.
«ЛГ»
